NPF Legislature Party-i tebilemtsü abener

Dimapur, Chiteni (July) 31 (TYO): Parliamentary Standing Committee-i Naga putiotsü agizükba aser teti atema telemtetba tajung ka agitsü jangraba atema NPF Legislature Party-i tenüngsang agütsür, ta sangdong ka nung metetdaktsü.
Parliamentary Standing Committee-isa tekaratiba nung Naga yimten tebilemtsü angatetteptsü akhangba pelaa agizüker. Iba atema Parliament House anaprong nung tekaratiba nung Report 213 benoka olemteptsü atema ayongzüker, ta NPF LP-isa ashi.
Assam nung National Register of Citizens (NRC) sayaba sülen Nagaland-i ozüng alema arurtem senoka aittsü ana nung lir. Anungji asenoki iba tebilemtsü atema mapa inyaktsüla. NGO aikati iba tebilemtsü atema ola adokba pelashishia agizüker aser sorkar dang arrtsülen administrative aser police forces talila yoktsü atema ayongzüker, ta NPF LP-isa metetdaktsü.
Tang Nagaland nung tzünglu kanga aruba ajanga lendong balala atalokba atema tebilemtsü abener aser tawa Aghunato o Phesama nung nisung taküm samaba atema mang yimer aser asür kibong ajak den asükhu lemsateper, ta NPF Legislature Party-isa ashi.
State sorkari anogo 60 tsüngda HQ lenmang ajak yanglushitsü ta nangzükba ama meinyak saka sorkari senzüsenbongertem timtemba atema mapa karbo inyaktsüla aser tasürtem nem teyari agütsütsüla, ta parnokisa metetdaktsü.