NPF Legislature Party senden amen

Dimapur, December 18 (TYO): December 18, 2017 nü State Banquet Hall, Kohima nung NPF Legislature Party senden amen. Iba senden nung adenertemi telemtetba aika agia liasü.
Naga yimten tekaraba nung latettsü atema Naga nungertemi aginür aser iba tenüng nung NPF Party ketdangpurtem tsüngda putepshitsü telemtetba agia mapa küma inyakba atema NPF Legislature Party-i tanü senden nung pelaba metetdaktsü.
NSCN(IM) aser NNPGs 6 den India sorkari yimjung olemtep agiba pusema nungittsü atema aser iba ajanga tekara nung Naga yimten lattettsü nükjidong nung NPF sasep nung putepshitsü telemtetba agi.
Maneni, okadak, Election Commission of India aser Nagaland Legislative Assembly speaker indang office tem nung NPF züngsemtem agienba aser anentsüba ken o benoka aliba ajak meyipa agitsü lemtetba atema parnokisa tenüngsang agütsü.
NPF Legislature Party-i putepshiba maparen nung longjemer nokdaktsü aser Naga yimten ken o tekaratiba nung latettsü atema yariteptsü ta parnokisa bangzünga renem.
Dr. Shürhozelie Liezietsu aser T.R. Zeliang lenisüba sülen anidaktsü aser pusema nungittsü, kechiyong tenati NPF Party aser DAN sorkar tejakleni anir aoer ta parnokisa bangzünga liasü.
Parnokisa 2018 State Assembly Election agitsü süra, NPF Party president Dr. Shurhozelie Liezietsu aser Chief Ministerial candidate ama T.R.Zeliang lenisüba kübok tokteptsü ta NPF Legislature Party-isa telemtetba agi.