NPF lenirtemi Governor-i jembiba maginer

NPP tir Dr Shurhozelie, MP Rajya Sabha KG Kenye aser NPF lenirtem Kohima nung Mongolbar nü NPF CEC senden aliba mapang ken atenba noksa nung angur. November 29, 2016.

Kohima, Nov 29 (TYO) : Nagaland Governor P B Acharya-i pa aolen ajak nung Nagaland nung NPF government-i ochimashi mapa inyakba indang jembibaji tim masü ta tanü NPF Central Executive Committee senden Kohima nung alidang NPF lenirtemi metetdaktsü.
Iba kasa senden nung PWD (National Highway) kilonser, Wb. Nuklutoshi-i jembidang, Nagaland governor-ba aser BJP teloki state government anema jembibaji kanga tim masü ta metetdaktsü.
“Tajaba melii Governor yimtsüngtem sema center sen amshia inyakba MGNREGA aser Midday meal amala mapatem repranga senzütsüsa moudaktsütsüla,” ta paisa metetdaktsü.
Wb. Nuklutoshi ya NPF Mokokchung aser Longleng districts incharge lir aser paisa ashiba agi, tamalen NPF nung mangatettep timtem adokdang Mokokchung-sa tamajungba amshi, saka tangbo tipdema lir aser kodangsüdir süaka Municipal aser General Elections agitsü asoshi renema dang lir.
Tang NPF teloki aniba DAN sorkar ya mapang tamajung ka ajanga aor, kechiyong iba mapang nung NPF telok nung timtem adokba dang masü saka center nunga tamalen Planning Commission liasüba nungi Niti Aayog melen, anungji iba jagi center nungi senotsü akhi ama mangur aser ano tang sen melenba ajanga timtem ajurudagi. Iba jagi tang tashi nung yimsüsürtemia nübortemi imlaba ama terenlok mapa meinyaktet, anungji ano lenirtem nem mapa inyaktsü maongka agütsütsüla ta Wb.Nüklutoshi-sa metetdaktsü.
Paisa lokti tentettem kar dang mepelaba ashidang, state nung ACAUT aser Mokokchung Town Lanur Telongjem ama telok yagi timi tenteta aliba Naga Hoho dang nungi tashi tuluba amshia timtem agütsür, anungji itemji government-i ‘derecognize’ sütsütsüla ta Wb.Nüklutoshiisa metetdaktsü.
Kasa senden nungsa Home Minister Y Patton-ia par medemer Wb.Nüklutoshii ashiba ama, Nagaland government-i state government ya ochimashiba government ta metetdaktsütsübaji tim masü ta metetdaktsü. ” Aji oda, pai assembly nung jembidang, ” ozü government ya ochimashi government-a,” ta shia pai ken o jembitettsü asü ta Pattoni-isa metetdaktsü.
” Governor alidak Raj Bhavan ya Heraka, RSS aser BJP purtem kazüdak ki amato kümogo, anungji ano tamajung küma maodang, NPF CEC aser CWC külem ser governor ya khen ajurua jembitsüla,” ta Patton-isa metetdaktsü.
Paisa Nagaland nung BJP lenirtem dang mejungi benshir masü saka NPF aliba agiang Nagaland nung parnok alir ta metetdaktsü.