NPF lenirtemi nübur takoksa ngudakja sorkar akumtsü meranger: NDPP

Kohima, Mongputeni/Oct. 04 (TYO): NPF lenir, T.R. Zeliang-i miimshai inyakbatem aser NPF lenirtemi nüburtem takoksa ngudakja sorkar akumtsü merangba mapatem sangdongtsüsa akumer, ta tanü NDPP Media & Communications Committee-i sangdong ka nung metetdaktsü.
NPF-i yimtenren tsütsü inyaklba mapatem atema tebilemtsü akar, kechiyong PDA sorkar tashi itta lir aser nüburtem nem ochi metetdaktsütsüla, ta sangdong nung shia lir.
Rongjui/Sept. 26, 2018 nü T.R. Zeliang den par kibong züngsem kati New Delhi nung Central nung BJP lenirtem, ajrua state nung tanaben Chief Minister akumtsü atema asalentong yanglu. Pai BJP lenirtem dang tang teinyakdak NPF Tir, Dr. Shurhozelie kümsük tatembanglen kati arudar aser lenir tasen ka shimtsü, iba sülen BJP den lokteptsü ta ashi. Dr. Shurhozelie kümsük tatembang kati arur aser paji BJP anemer ka lir, anungji pa kümsük tembangba sülen parnoki BJP den amalitepa inyaktsü ta ashi,” ta NDPP-i metetdaktsü.
“Paisa maneni yazü jembia BJP lenirtem dang independent MLA, JD(U) aser NPP den NDPP züngsem kari pa den adentsü melunga lir ta shiogo. Pai BJP dang pa CM kümdaktsüra pai parnok nem parnoki melungba portfolio agutsütsü aser Nagaland nungi Lok Sabha aser Rajya Sabha menden napronglaji BJP nem agutsütsü ta shiogo. Paisa Outer Manipur Parliamentary Lok Sabha menden nung BJP anema metoktepdaktsütsü ta shiogo,” ta kasa sangdong nung shai lir.
“BJP lenirtemi pa dang BJP-NDPP teloktep ya election matongdang teloktep yangluba ka lir aser PDA teloktep nung CM candidate sangdongtsü atema Ato kilonser Nagaland-i aru ta metetdaktsü. BJP-isa T.R. Zeliang dang BJP ya khuret metetba national party ka lir aser nüburtemi tamang kaa yaribaji mashioktsütettsü ta shiogo,” ta sangodng nung shia lir.
“BJP lenirtemi magizüki pa Nagaland-i meyipa aruba sülen pai maneni yazü jembia NPF lenirtem fang sorkar tasen akumtsü atema BJP bangdakpurtemi yaritsü ta shiogo ta jembi,” ta sangdong nung shia lir.
Item ama yasü aika jembiaka onoki nüburtem ang PDA sorkar tashi itta lir aser tangatettep nung amalitepa inyakdar ta metetdaktsür. PDA-i Delhi nung NDA dak tamang akar aser külemi khuret bena inyaker, ta NDPP-isa metetdaktsü.