NPF lennirtem tashi raktepba onük tuluba kümogo; Kohima nung gari 2 rongdoktsü; TR Zeliang’er telok amokmeren

Fire brigade ketdangsertemi Maruti van gari nung mi enseptsü merangdang agiba noksa abelen nung angur. Achiji nung TR Zeliang aser pa pusemertem amokmerena züluba placard tem angur.

Kohima, July 16 (TYO): Deobar aonung Kohima nung NPF MLA tem anenzüka aliba hotel kima nung mejangjatetba nisung kari gari ana mi agi rongdoktsüba aser amokmeren o zülur tezülubatem yutsüba ajanga Naga People’s Front (NPF) sasep nung tashi raktepba onük tamajungba kümogo.
Lok Sabha MP Neiphiu Rio’er jabasoi lapokba hotel nung tang TR Zeliang pusemba NPF MLA 36 aser Independent MLA 7 anenzüka lir. Taonung iba hotel anasa Maruti Van ka mitsü küma rongdoktsü aser ano Maruti Car ka tera arong.
Hotel ji Kohima jila nungi kilometre 5 shi pilar lir aser lendongji taonung 7:30 ako meta atalok. Iba osang angashili police-i iba tesem tonga ao.
Iba temeket nung aliba public temi Maruti car nung miji enseptet saka Fire brigade ketdangsertemi enseptsü merangaka Maruti van garijibo mitsü küma rongdok.
Iba mapa inyakertemji shirnokar mejangjateter saka Maruti car anasaji teka agi züluba placard kar yuja liasü aser item nung TR Zeliang aser pa pusemertem amokmerenba o zülua lir.
“TR Zeliang, nai onok komo nung metzü enoktsütsü atema nür medemertem ozü litsüi anir aru asü?”, “TR & Co, nenok ozü litsü toktsür oadokang, onoki maginüaka by-election agitsüba mapang ka lir”, “TR Zeliang, nai CM anema nokdaktsü atema ozü Assembly Constituency menden toktsütsü dang ata liasü asü?”, “Onoki iba ya onok anema ozüng alema inyakba mapa ka ta züngshir”, “Y Patton, na CM tenüng asangtsü aser par yimertem ashioktsütsü atema Kohima Village-i aru asü?” ta tezülubatem nungji zülua liasü.
TR Zeliang pusemertem anenzüka aliba hotel ji Northern Angami-I Assembly Constituency kübok lir aser iba menden nungi tang teinyakdak Chief Minister Dr Shurhozelie Liezietsu-i by-election nung tokteptsüba lir.
Iba tatalokba dak sendakba nung police-i ken o ka benokogo aser aibelenertem aputsü atema bushisüngdang ka tenzükogo ta osang angazüker.