NPF longjema lir aser kecha masütsü : Dr Shurhozelie

Rio CM kümdaktsütsü atema MLA tem Kaziranga nung adenshi

Guwahati/Dimapur, February 18 (Agencies) : Nagaland nung Nephiu Rio-i T. R Zeliang ket nungi Chief Minister menden melenzüktsü akok ta osang kar jembiba mapang Honibarnü Naga Peoples Front (NPF) president Dr Shurhozelie Liezietsu-i ashiba agi, NPF party longjema lir aser mepetmesü kecha madoktsü.
Honibarnü Central Office Bearers den Division Presidents tem NPF Central Executive Council rongdak senden ka amendang, Dr Shurhozelie-i party lennirtem dang shisamebului atatsü mepishia metetdaktsü.
“NPF MLA tem kar Kaziranga, Assam nung lua lir saka parnokji NPF MLA tem dang lir aser onoki parnok den tongtepratepdar. Anogo ka-ana tsüngda temelenshi ka angutsü” ta paisa ashi.
NPF Party President aser NPF Legislature Party indang Chief Whip naprong party nung dena lir aser tang Kaziranga maparenjia 2015 küm tamakok anguba ama asütsü, ta tanü senden nung adenertemi ashi.
Ano külen, Kaziranga nung NPF MLA kar den tongtepratepdang, parnok Kohima-i kobi melii meyipa arutsü ta ashi.
Osang ka ajanga ashiba agi, Honibarnü Naga People’s Front (NPF) nungi MLA temi Chief Minister T.R. Zeliang melenzüktsü atema Lok Sabha MP, Neiphiu Rio ‘legislature party leader’ shimtsü pusema nungit.
Honibarnü NPF nungi MLA 47-i party president Shurhozelie Liezietsu toktsür Kaziranga, Assam nung aliba resort ka nung adenshi aser parnoki TR Zeliang aser Rio den ajuruteptsü, ta osang ajangasa shisem.
MLA temji Kaziranga nung senden ka nung adentsü alu aser parnoki Angh P B Acharya New Delhi nung meyipa aruba sülen sorkar akümtsü atema kuli agütsütsü.
Rio aser TR Zeliang nati union home minister Rajnath Singh aser tanga tongti ketdangsertem den ajurutepa Nagaland nung tensa mejungi aliba jungdaktsütsü atema telemtetba agi.
Tanü anüngdang Angh P.B. Acharya aser Nephiu Rio na Dimapur tonga aru aser iba sülen Angh Kohima-i atu aser Rio Kaziranga-i alu.
“Yimtenren tsütsü jembitepba osangtem ni angazükogo saka ni iba jembia maodang, tamasa MLA tem den ajuruteptsü” ta tanü Dimapur airport nung Rio-i osangbener dang ashi.
Kaziranga nung MLA tem ajurutepa senden ka amendang Lok Sabha MP Rio-i pa Centre nungi Nagaland nung mepetmesü angatetteptsü atema yok ta ashi.
Rio ya tang NPF party nungi züngsem agiena lir aser ibaji meyipa magi tashi pa NPF tenüng nung Chief minister inyaktsübaji tamakoktsü lir. Iba atema senden nung adenertemi NPF ketdangpurtem dang Rio tanaben party nung anioktsü atema asüngdangtsü lemtet, ta osang angazüker.
Angazükba agi, Kaziranga nung lua alirtem parnok karbo Nagaland-i meyipa aruogo aser ano kar asüng (Deobar) TR Zeliang den ajurutepatsü atema idakji mungdar.