NPF mangatettep nung onok maden: AYO

Kohima, August 24 (TYO): Tang NPF telung nung yimtenren mepetmesü aliba nung Angami Youth Organization (AYO) maden, aser ibayongji onoki iba nungjagi talanga pilaogo, ajisüaka iba tensa ya mejungi odar aser tzüzüng-ozüng tensa aiben atalokogo, koba ajanga tesünep raksatsür, ta tanü AYO Tir, Neinguvoto Krose aser PRO, Petevito Nakhro nati sangdong ka nung metetdaktsü.
“Onoki nüburtem security, taküm aser kiojen kümzüka alitsü atema bilemtsür. Anungji onoki tasümait mapatem aser ozüng alema inyakertemi nisungtem tsübudakja amokmerenba mapatemji aitsür,” ta AYO sangdong ajangasa metetdaktsü.
“Onokisa ozüng amer agency dang item nisung tamajungertemji ozüng kübok tapet section nung tangsa aputsü mepishir, iba den külemi item ama tatalokba malitsü atema iba sangdong ajanga tekümdangtsü metetdaktsür,” ta sangdong nungsa shia lir.
August 11, 2017 nü Commissioner & Secretary Nagaland Legislative Assembly, Benjamin Newmai par kidang amokmeren, August 21, 2017 nü Commissioner & Secretary (RD), Kelei Zeliang amokmeren aser August 21, 2017 nü hotel Vivor dak injang khaloktsü; aser item tatalokba ya mapang tatsüka tsüngda nung dang atalokogo, anungji nüburtem terasaba malitsü atema item mapa tamajung meinyaktsü metetdaktsür, ta AYO-isa ashi.
“Item tatalokba nung ajemdaker AYO-i tekaraba nung presidential council meeting amentsü, anungji onoki Angami village unit Tir aser executive züngsem ajak dang iba senden nung adentsü atema renema alitsü mepishir. Iba senden anogo aser mapangji jelia metetdaktsütsü,” ta AYO lenirtemisa metetdaktsü.