NPF Manipur state unit-i Dr. Lorho atema nüboyim tenzükogo

Senapati, March 27 (TYO): March 27, 2019 nü Naga People’s Front (NPF) Manipur state unit-i taruba Outer Manipur Parliamentary Constituency atema Senapati nung NPF official candidate, Dr. Lorho S. Pfoze atema nüboyimba sentong tenzükogo.
Iba sentong nung jembidang NPF Tir, Dr. Shurhozelie Liezietsu-i, “Taruba Lok Sabha election ya asenok ajak atema kanga tongtibang,” ta metetdaktsü.
Pai ashiba agi, January 8, 2019 nü Lok Sabha-i agizükba Citizenship (Amendment) Bill ya asenok atema amokmeren ka alir.
“NPF MP densema opposition tashi itta aliba agi Rajya Sabha nung iba Bill magizüktet,” ta pai ashi.
Tawa BJP Tiri “BJP-i tanaben sorkari kümra parnoki iba bill agizüktsü” ta shiogo aser BJP indang election manifesto nung CAB inoksemtsü ta shiogo, ta shia Dr. Liezietsu-i, “Iba tetezü kechi südir süaka party (BJP)-i ibaji inyaktsü tebilemba lir,” ta ashi.
Iba bill benokba tongti nükjidongji Afghanistan, Pakistan aser Bangladesh ama kidanger linüktem nungi tamangba yimsü kar nungi nisungtem India-i arudaktsütsü atema lir, ta shia Dr. Liezietsu-i, iba bill tongti nükjidongji item nisungtem nem India senso agüja Passport Act, 1920 aser Foreigner 1946 ama Acts aser Rules kar agientsü atema lir, ta ashi.
Dr. Liezietsu-i, North east nübur ajaki CAB anema nokdaker, kechiyong kodang iba bill agizükdir ibaji ajanga North East lisopurtem amokmerentsü, ta ashi.
“Shirnok BJP, mesüra Congress, mesüra NPF ta shinga mesükshii ibaji ajanga yipru ama ajak raksatsütsü. Asenok mapang nung asenoki aibelenba ajanga tarutsü putu lendongi meyokner. Yamaji atalokra asenok dak nungi jakzükertemi asenok dang kodanga tai matoktsü,” ta Dr. Liezietsu-i ashi.
Paisa nüburtem dang, tarutsü putu kümzüka ayutsü atema asenoki aibelen masütsüla, ta ashi.
Dr. Lorho-ia voters dang pei senti vote ji pa nem agüjang, kechiyong pai Parliament nung nübur atema jembitsü aser lispourtem temeden atema inyakba den terenlok aser yimjung atema inyaktsü, ta mepishia metetdaktsü.
Kasa sentong nung K.G. Kenye, MP Rajya Sabha Nagaland aser secretary general NPF, Huska Yepthomi, working president NPF aser MLA Awangbow Newmai, president NPF Manipur State Unit nungeria jembia liasü.
Sentong tetenzüklen MLA K. Leishiyo-i lokti pelaa agizükba o jembi aser Manipur PHE & Printing & Stationary Minister, L. Dikho-i tepela anküp o jembia liasü.