NPF Manipur Unit-i NPF Central pusemer

Imphal, August 27 (Agencies): Nagaland State nung Naga People’s Front sasep nung mepetmesü adoka liaka, NPF Manipur State unit-i NPF Central pusema nungittsü bangzünga renemogo.
NPF Central-i state aser Centre nunga BJP den yariteper, anungji iba telok pusema nungittsü ta tetemtetba agi.
Honibarnü NPF indang Manipur State unit ketdangpurtem senden ka amendang iba onük bangzünga renem aser August 12, 2017 nü lemtetba ama Manipur nung BJP den maneni yaritepa aotsü nangzükshi.
Senden nungsa taoba Chief Minister Rishang Keishing asüba atema mang ayim. Rishang Keishing ji state nungdang masü saka linük jenjang nung ajaki metetba yimten lennir ka liasü ta Manipur State unit NPF-i metetdaktsü.
Asür Rishang asübaji Naga loktiliba atema dang masü saka state ajunga atema takoksa ulura lir. Pai toktsür aoba ongdangji menembangtettsü kechiyong pa ama lennir tajung ka akümtsüji tezüpa masü, ta parnokisa ashi.
Manipur State unit NPF-isa tasür kibong den asükhu lemsateper ta shisem.
Ano, NPF, Manipur State unit-i Manipur Minister L Dikho tebu Nepuni Lossii asüba atema mang ayimba osang metetdaktsü.
Nepuni Lossii ji Tsüngrem tsübuba arogo lennir ka liasü aser pa ya lokti nunga tanishir ka liasü, ta NPF-isa ashi.