NPF Mkg Div tir tasenba lenisüba nung mezüng lokti senden aka

Mokokchung|August 26 (TYO): Naga People’s Front Mokokchung Division tir tasen shimsang Wb. Rongsenmongba Jamir lenisüba kübok NPF Mokokchung Division pur mezüngbuba lokti senden ka parnok office Mokokchung nung ayongzüka menogo.
Iba senden nung NPF central office nungi lenirtem den NPF Mokokchung Division ketdangpurtem, Frontals nungi aser Assembly Constituency 10 nungi ketdangpurtem adenshia shilem agia aden.
Tanü iba senden nung teloki bangzüng pezü renema yuogo. Mezüngbuba nung; tawa khen atema (interim) shimba NPF Mokokchung Division tir Wb. Rongsenmongba aser tongti zülur (Administration) Wb. Bendangnukshi tenaji full-fledged President aser General Secretary (Admin) asütsü aser teloki tena lenisüba nungittsü mulunga agizük.
Tanabuba nung; NPF Mokokchung Division, Ao legislator ter (10), Frontals ajak den Mokokchung district kübok Assembly Constituency 10-i NPF tir tasenba & Lok Sabha MP Wb. Neiphiu Rio aser Nagaland Chief Minister Wb. T.R Zeliang na lenisüba nung nungittsü maneni renemogo.
Tasembuba nung; August 22, 2017 senden nung Naga yimden tebilemtsü dak sentakba nung koba NPF central office aser CEC züngsemtemi telemtetba tajung agiogo, ibaji Mokokchung Division-ia pelaa agizüker aser Division-ia nungiter, ta lemtet.
Pezübuba nung; Mokokchung Law College ya sorkar nem bendanga agidaktsüba maparen achayangtsü atema Ao legislator ter (10) nem nungloktsütsü lemtet.
Iba senden nung central office nungi Vice President Wb. R. Lepdeni jembidang, tawa yimden nung mepetmesü adokbaji party tenzükertemi aibelenba masü saka tongtibangsa Dr. Shurhozelie Liezietsu-i nangzükba ama meinyakba nungi adokba lir, ta kuli kar bener arua ashi.
‘Aor legislator 10 lungjema lir, aji oda, asen lenirtem (elected member) lungjema lir asünung, asenok party worker-tem tsüngda telok balala küma lemsatsü nüngdak madoker’, ta pai party tenzükertem lungjema lidaktsünüba olen ka ashi.
Dr. Shurhozelie-i aiben NPF temzüngji pa yanglushinütsü yanglushia tashiyim mapa inyaker. Anungji, tang ya NPF party melenerba masü saka NPF lenir melenteperba dang lir aser tangji Neiphiu Rio den party pur teimba lir, ta pai jangjashitsü. Aji oda, “politics nungbo teimbai mulungba nung aor”, ta paisa shisem.
Iba sentong nung NPF central office nungi tongti zülur Wb. I. Yanger-ia mapang tatsüka agia party inyakyim aser teinyaktsü kar lemsatep. NPF Mokokchung Div tir Rongsenmongbai tarurtem ajak pelaa agizük aser tatong tir P. Imsüi tepela o lemsatep. Iba senden nung bangzüng ludeni bener aruba bangzüngtem teloki teka metonga agizüker ayu. Rev. Luin Jamiri temoatsü meshia sarasademer iba senden tenzüka liasü.