NPF Mkg Division ketdangpurtemi Power House semdang; September 17 tashi nungi power supply angutsü

September 15, 2015 nü Mokokchung Power House nung NPF Mokokchung Division ketdangpurtem den Mokokchung Power station staff külemi agiba noksa angur.

 Dimapur, September 15 (TYO) : Mongulbarnü NPF Mokokchung Division tir Moasangba Jamir-i anir ketdangpurtemi Salangtem Ward nung aliba Power House semdang.

August 26, 2015 nü 5MVA power transformer raksaba sülen nungi joko hopta asem shi Mokokchung nung power supply peria mongui timtema arur.

Tanü NPF lennirtem den ajurutepa sensaksemdang Temjensangba SDO (E), Mokokchung-i ashiba agi, transformer amenokba mapa joko shilem tulubalenka renemogo aser department-i September 17 nikongtsütsü tashi nung power supply agütsütsü atema meranga inyakdar.

Iba mapang Moasangba-i Aolijen nungi electrical maintenance staff aser transmission staff-i Mokokchung aser temeket aliba yimtsüngtem nung power supply agütsütsü atema meranga inyakba atema tenüngsang agütsü.

Iba ya Mokokchung nung power timtem ajuruba rongnung tamajungtiba lir aser iba timtem ajanga public aser talisa shishilembartem takoksa jenti nguogo. Tang ajuruba timtem ya tatishitsü ka südaktsür tarutsü nungbo ibala mesükba timtem majurutsüsa inyaktsü ayongzüker, ta NPF Mokokchung Division tirisa ashi.

Tanü Field Staff tiri NPF Mkg Division dang parnok semdangba atema pelaba metetdaktsü aser iba amala tensa ajurutsü meimla liasü ta paisa ashi.

Iba ama tensa ka nung Nagaland Power Minister-i Mokokchung nung alirtem atema aria bilemja teyari agütsüba atema Mokokchung NPF tir Moasangba-i pa dang pelaba metetdaktsü.

Moasangba-isa Power Department nung Chief Engineer dang Mokokchung atema transformer tasen ka agütsütsü abenbaji tezüluba nung dang masü saka mapa küma inyaktsüla ta mepishia metetdaktsü.