NPF MLA temi ruling NDPP den tesendaktep yangluner

Kohima, Metsüremi/March 07 (TYO): Nagaland yimtenren nung temelenshi ka adoka opposition party- Naga Peoples’ Front (NPF)-i taruba Lok Sabha election matongdang ruling party- Nationalist Democratic Progressive Party (NDPP) den tesendaktep yangluner, ta Brihostibarnü osang ka ajanga metetdaktsü.
Osang ka ajanga ashiba agi, NPF MLA 26 nungi MLA 18-i NPF Legislature Party Lenir, T R Zeliang nem March 6 nü shidi ka aguja pa dang Lok Sabha election matongdang NDPP den teinyaktsü maparen kar inyaktsü asüngdangogo.
NPF MLA temi züluba shidi nungji yamai shia lir, “Tang state aser linük naprongla nung yimtenren tensa nung ajemdaker state nung tashitait teloktep ka nüngdaker, koba ajanga nüburtem ajangzükdaktsütsü aser taruba Lok Sabha election nung tetsükdaktsütem koktettsü ta parnoki (NPF MLA 18) bilemer.”
Party telung osang ka ajanga ashiba agi, iba shidi agutsüba sülen NPF MLA 18 den TR Zeliang nunger Kohima nung aliba De Oriental Grand nung mongdar aser yashi nungi tenzüka o lemtepa arudar.
Kasa osang ajanga ashiba agi, tanüngba MLA tenetbo iba o lemtepba nung madener, kechiyong tang parnok kar Kohima nung mali aser MLA asembo shirangdar.
Ajisüaka tang Kohima nung malirtemji Hokolbarnübo parnok rongnung adentsü aser tatembang telemtetba ka agitsü imlar, ta NPF Party osang ka ajanga metetdaktsüogo.
Iba shidi nung sign asurtemji- Imkong L. Imchen, Azheto Zhimomi, Moatoshi Longkumer, Kejong Chang, Amenba Yaden, Y M Yollow, Muthingyuba Sangtam, Eshak Konyak, Dr Imtiwapang Aier, Picto Shohe, C L John, Chotisuh Sazo, Y Vikheho Swu, Yitachu, Kezienyi Khalo, Keneizhakho Nakhro, Khriehu Liezietsu aser Dr Chumben Murry nunger lir.
Shidi nung sign asürtemji parnok 18 lir saka tanüngba MLA karbo parnok den densema lir.
Osang angazükba agi, Kohima nung ki malirtem De Oriental Grand hotel nung mongdar aser tangartemjibo pei kidang nungi anepdang arua aonung tesü tashi senden nungji adener.
Osang angazükba agi, NPF MLAs- EE Pangteang, Dr Ngangshi K Ao aser Toyang Changkong Chang nunger asüngbo parnok rongnung adentsü, saka MLA Kuzholuzo Neinu atemabo arendaka bilemer.
MLAs- T. Torechu, Thongwang Konyak aser E E Pangteang nunger temang manemi lir, saka parnok den adentsü melunger, ta kasa osang ajangasa metetdaktsü.