NPF Mokokchung Div pur kimen mesemogo

Mokokchung, Oct 7 (TYO): Naga People’s Front Mokokchung Division pur mapang talangka Kimen melii arur, Bodbarnü Mangmetong nunger advocate Wb. Temjenkabar kibongi kimen asütsü khuret mulunga agizükogo. Tanü iba kimen meshiteta Kumlong Baptist Arogo Associate pastor Wb. Kiküm arua sarasademtsü.
Kimen mesemtetba temaitsü NPF Mokokchung Division tir, Wb. Moasangba Jamiri NPF wako meraketa atsüketa yutsüogo. Tanü iba sentong nung division ketdangpur den frontal nungi Women Wing, Youth Wing aser Farmer’s Wing aser ano Constituency balala nungi party ketdangpurtem arua shilem agia denogo.
Iba sentong nung NPF division tir, Wb. Moasangbai jembidang, samabapurtem kar atadang mapang tera menu, aji saka, tang mesemtetba ya Tsüngremer sentong asütsü südi ta ashi. Aji oda, tsürabur Temjenkabai Kimen asütsü khuret benzükba asoshi division tenüng nung pelaba lemsatep.
Tsüngsak mopung balala aruaka, pei noktakba nung ochi shia aser tangatetba tajung alitsü asoshi paisa party lenirtem ayongzük. Tashi maittem lira tsüngdong oa kibok nung metongshiteptsüla, saka kima yimdong nung o tokshia bangsena mesenzütsü asoshi paisa inyakdaktsünüba ka ashi.
“2018 general election nungji Mokokchung district menden ter nungi NPF-i ter prongla angutsü asoshi tang yongi meranga inyaktsüla, aser peii kecha meinyaktetra peisasa angateta sodi meshitsüla” ta paisa ayongzük.
Division kübok frontal asem lir, aji oda, “frontal rongnung tanela tajung nung tajungtiba asütsü toktepa inyakdaktsüner” ta paisa ajungshi.
“Kong akhümtsübutep lir yangji tesünep lir, aser kong tesünep lir yangji yimji-yimjung aser temaotsü lir” ta shia party pur dang khuret abenba lenir kaka asütsü maneni ayongzük.
Tawa Nagaland Chief Minister TR Zeliang-i Mokokchung semdanga Ao Sendeni anir lokti balala den ajurutepa sorkar sentong aser Naga yimten dak sentakba indang lemsatepogo, ibaji nüburtem asoshi tajangzük tulu akaba maparen lir ka ta paisa ashi.
Kasa sentong nung Temjenkabai kimen mapa agizükba tepela o jembi. Frontal asem; Women Wing tir Arenla, Youth Wing tir Moluba, Farmer’s Wing tir L Yanger, NPF Mokokchung Division Adviser Aoshingang aser AC nungia ketdangpur kari shilem agia liasü. Tsürabur Temjenkabar kiji Mongsenbai Ward nung lir.