NPF Mokokchung Division-i orientation ka ayongzüka agi

Dimapur, Metsüremi/March 21 (TYO): Naga People’s Front, Mokokchung Division-i, Media Awareness & Strategic Communication dak sendakba nung March 21 nü Orientation sentong ka ayongzüka agiogo.

Iba sentong ya NPF Mokokchung Division Office nung kanga takok ngua agiogo.

Iba Orientation sentong nung shisalen sayurji Assistant Professor, Department of Sociology, Fazl Ali College, Mokokchung Dr. Limasenla Jamir liasü, shibai media awareness, responsible communication aser nüburtem tangatetba yanglushitsü atema digital amshiba shilem indang tangazükba agütsü.

Tanü ama media luyim kanga kara meleshia aoba mapang ka nung khuret angateta tongtepratepba aser digital dak sendakba nung tangzükba akatsüji kanga tongtibang lir.

Iba sentong ya züngsetem nem shisatsü tali tajungba agütsütsü, tongtepratep tajungba süteptsü aser party tangatetba aser tamendakdak maneni tejakdangi bener aotsü asoshi tangazükba agütsütsü nükjidong nung agiogo.

Sentong nung district kübok assembly constituency balala nungi party kübok telen balala nung inyakertemi shilem agia liasü, ta NPF Mokokchung Division Media Cell sangdong ka ajanga metetdaktsü.