NPF, NDPP aser NCP-i ticket lemogo saka shingaia nomination masü

Kohima, Tsüklai 5 (TYO): Nagaland nung political party temi tanü nungi candidate tem nem ticket agüjaka Tsüklai 27 nü Assembly election atema candidate shingaia nomination masü süiogo.
“Tesem kecha nung nomination masü” ta CEO Nagaland Abhijit Sinha-i ashi.
Küptoknü BJP-i candidate 20 indang tenüng metetdakja liasü aser ano Naga People’s Front (NPF)-ia tanü candidate 58 indang tenüng metetdaktsüogo.
Ano, Nationalist Congress Party (NCP)-i candidate 6 nem aser Nationalist Democratic Progressive Party (NDPP)-i candidate 40 nem party ticket lemogo.
Ajisüaka, tanü tashi nung candidate shingaia nomination paper magütsü. Aenjeti 31, 2018 nungi nomination asütsü mapang lapoktsü saka tanü agi anogo trokbuba nung candidate kati danga nomination masü süiogo.
Tanü Party Headquarters nung NPF Working President Apong Pongener-i osangbener den jembidang “Onoki menden ajak nungi tokteptsü, aser party district division nung ticket alemtsü” ta ashi.
Candidate 58 tashi shimogo aser tanüngbaji asüng shimtsü, ta paisa ashi.
NPF-i anir nomination asüba mapa tenzüktsü asü ta osangbeneri asüngdangdang “Election nung tokteptsü mesüra metokteptsü indang telemtetbaji political party temi dang agitsü ta Naga kin teloktemi nungloktsüogo, anungji onoki nomination asütsü” ta Apong-i langzü.
“NPF-i nüngdakba mendentem ama takok angutsü aser tang-a sorkar akümtsü tashi angutsüsa” ta paisa shisem.
Tanü NCP Nagaland Unit President, Vanthungo Odyuo-ia ashiba agi, par party-i candidate 10 toktepdaktsütsü.
Party high command-i mezüng tenüng trok mulunga agizükogo aser parnok nem tanü ticket lema agütsüogo aser tanüngba candidate tem nema agütsütsü, ta Vanthungo-i ashi.
“Naga kin hohotem aser civil society temi akhangba pusema onoki Aenjeti 29 Joint Declaration nung noktaka lir. BJP aser NPF dena tongti political party temi nomination asüba atatsü aser iba sülen onokia asütsü” ta paisa metetdaktsü.
NCP-i telok shinga dena pre-poll alliance meyanglutsü ta paisa shisem.
NDPP-i BJP den pre-poll alliance yangluogo aser ibaji menden 40:20 lemsatsü tangatetba nung lir. Tanü NDPP-i Dimapur district kübok Chumukedima nung party ticket tem lema agütsü aser iba sentong nung NDPP tir Chingwang Konyak aser chief ministerial candidate Neiphiu Rio na aden.
Nagaland nung JD(U) indang headquarters ji Wokha nung amenoka lir aser parnokia taruba assembly election nung candidate 11 toktepdaktsütsü. Taoba minister G Kaito Aye-i NPF nungi anen aser JD(U) nung denogo.