NPF nung tsük aser tsüksü bendangogo: Dr Shurhozelie

Dimapur, July 22 (TYO): Nagaland sorkar nung tang mepetmesü adokba ya temoatsü ka lir, kechiyong iba onük ajanga tsük o tsüksü na bendangogo, ta Naga People’s Front tir aser taoba chief minister, Dr Shurhozelie Liezietsu-i tanü ashi.
“Onoki lennir tamajungtem ajitetogo aser party ajungtsü atema parnok züngdokogo. Tang party nung lennir tajungtem dang anünga lir. Ochimashi aser tangatetba tamajung aliba lennirtem züngdokba ajanga tang nungibo party-i Naga nunger ajungtsü atema timi maparen inyaka otettsü” ta Dr Shurhozelie-i tanü nikongdang par kidang sentong ka nung jembidang ashi.
NPF party den akangakanga nokdakba NPF MLA 11 ji “NPF party indang metsüjangtem” lir, ta paisa shisem.
BJP-RSS tesayuba aser tangatetbatem anema jembidang, Dr Shurhozelie-isa ashiba agi, “NPF-i Naga nunger maitsü aser temetentem kümzüka ayutsü atema BJP den tesentaktep ajak raksatsüogo. Tesüiba mapang BJP den tesentaktep aliba ajanga NPF-i aiben ochi mejembitet. Ajisüaka, tang nungibo NPF-i Naga nunger atema ochi jembitsü atema marentaktsü.”
“NPF-i Hindu yimsü anema menokdaker saka BJP-i Naga yimten mapa nung meinprong mesüdaktsütsü aser Angh PB Acharya, shiba RSS pracharak tajung ka lir, pai linük temzüng alema ozü sorkar anentsüogo saka pai Nagaland nung BJP sorkar ka akümtsü alizüng alibajibo kodanga metongtettsü” ta paisa metetdaktsü.
NPF party-i BJP den tesentaktep pila yonga Prime Minister Narendra Modi-i Naga yimten tebilemtsü atema inyakba mapa tashi itdaktsüba aser ochimashi anema inyakba mapatem pela agizüker, ta Dr Shurhozelie-isa shisem.
TR Zeliang aser par teloki sorkar samatsü aser tang parnoki party loksaktsütsü atema meranger. Ajisüaka, party lennirtemi tenangzükba nung masetshii nokdakra, sen mesüra tashi kechaia party samatsütsü makok, ta Dr. Shürhozelie-isa shisem.
MKR Pillai ken o atema olen ka jembidang, “kechiba MLA aikati iba ken o CBI nem agütsütsü memulunger?” ta Dr. Shurhozelie-isa asüngdang.
Sentong nung NPF MLA, CL John-ia o tatsüka jembidang, “tang ajuruba tebilemtsü ya party atema ‘vitamin’ ka ama lir aser iba mapang party nungi ochimashi MLA tem agienogo. Tang nungi party tashitaitba akümtsü aser asenoki tang ajuruba tensa ta party tashi aittsü atema asentenshiba mapa ka lir” ta metetdaktsü.
NPF MLA, Yitachu-ia “NPF party tashitaitba küma aoer. Naga nunger aliba tesemtem ajak nung NPF rashia aoba atema Centre nung BJP sorkari tsübua bilemer aser iba jagi parnoki Dr. Shürhozelie-i aniba NPF sorkar chidaktsütsü atema kanga meranga inyak” ta ashi.
Shirnoki NPF party tangatetba nung nokdaka lir, parnokji Naga nunger tarutsü kümzüka ayurtem lir, ta Yitachu-isa shisem.
“MLA tem tsüngda tashi atsütepba ajanga NPF party nung khuret ka khen ka ta ajurua aru aser iba jagi MLA temi state renloktsü atema mapang magütsütet. Anungji, tang nungibo nübortemi tenendak aser bendanga agütsüba lennirtem dang shimtsü ayongzüker” ta MLA, Vikheho Swu-ia ashi.
Party legislature nung mepetmesü adokaka party lennirtemi akangakanga nokdakba atema MLA Chotisu Sazo-i parnok nem tenüngsang agütsü.
“Tang sorkar akümer MLA temi party lennirtem mesüzüktsü atema merangtsü akok saka nenoki party tangatetba nung ajemdaka aliba nungi mepilatsü ayongzüker” ta Sazo-isa ashi.
Iba sentong nung NPF working president, Huska Yepthomi, Women Wing President, Tonlih Wangsa, Youth Wing President, Vihoshe Swu, Farmers Wing President, Lanukaba Ao aser Minority Wing President, Bishnu Bhattacharjee nungertemia o jembi.