NPF Press and Information Cell-i ACAUT aitsür

Dimapur, August 26 (TYO): April 6, 2017 nung benokba RTI application nung ajemdaker August 25, 2017 nü ACAUT-i osangkakettem nung Chief Minister TR Zeliang dak tai tongloktsüba atema NPF Press and Information Cell-i ACAUT nem onük kar meyiptsüogo.
Finance Department-i sen agizükba osang Chief Minister-i miimshir aser June 8, 2017 nü Appellate Authority- Finance Commissioner tsüngdang parnoki ken o benok ta ACAUT-i ashir.
RTI Act 2005 nung activist kati mezüng department indang PIO tsüngdang ken o benoktsüla, iba sülen jiang Appellant Authority dangi aser Appellant Authority-i mekokra, tatem nung Chief Information Commissioner (CIC) dangi abentsü shia lir. Ajisüaka, ACAUT-i CIC ajangdanger yimjak nung osang metetdaktsü aser iba jagi mashimemetetba aser miim sentongtem aliba kuli sayur, ta NPF PIC sangdong nung ashi.
“April nungi July 2017 tsüngda sorkar nung shibai Finance in-charge bena liasü? Finance department nung Advisor kati osang miimbanga ayutsü atema pa nem kechi tashi agüja lir? Kechiba ACAUT-i taoba Chief Minister aser Finance Department In-Charge Dr. Shürhozielie dangbo kecha masüngdanger?” ta parnokisa asüngdang.
TR Zeliang-i Chief Minister menden nung amenba sülen ang ACAUT-i iba onük jembiba ya pa tenüng menüktsütsü atema lir. Ano, talisa Dimapur nung ACAUT rally aliba anogo nungang iba sangdong agütsüba ya public anidentsü atema inyakba mapa ka liasü, ta NPF PIC-isa metetdaktsü.
ACAUT-i yimtenren tsütsü miim tebilemba aliba Naga nunger ajaki ngua lir. Parnoki non-political organization ka ta kuli agütsür süra, ACAUT sasep nung pei ajungtsü asaa inyakba nisungtem jangjatsüla aser parnokji tongti mendentem nungi agientsüla, ta sangdong nungsa metetdaktsü.
T.R. Zeliang’er sorkari tashishitsü melii aser jungjunga ketdangsütsü koka lir aser iba tenangzükba agia inyaker. Alizüngtem tongteta inyaktsü atema department ajak tiptemogo, ta parnokisa ashi.
Sorkar ya pei atema masü saka nübortem atema lir, ajisüaka nisung kari T.R. Zeliang’er sorkar tiptema moudaktsütsü meranger aser parnoki pa tenüng menüktsütsü atema tai tonglokja anidaker.
Item nisungtemi T.R.Zeliang’er sorkar atsüngdoktsü merangaka, public-i tajung aser tamajung tsüngda bendangtettsü ta onoki tamang akar. Tasa aika atonga inyakaka, Nagaland nung alirtemi sorkar yaritsü aser amalitepa asen state nung yimjung, terenlok aser azükarutsü atema tejakleni aotsü imlar, ta NPF Press and Information Cell-isa metedtaktsü.