NPF telok majuruteptettsüsa pakdangogo: K.Therie

Mkg. Jan. 28 (TYO): Nagaland Pradesh Congress Committee (NPCC) lenirtem Nagaland ajaklen nübortem ajurua jajaba sentong nung tanü Brehostibar nü Mokokchung aser Zunheboto town na prongla nung lokti senden ayongzüka agiogo.
Iba sentong nung jembidang, Nagaland nung tang yimsü tesüdak telok NPF nung telemsa kanga mejungi adokogo aser joko parnok kodanga majuruteptettsüsa pakdangogo, ta NPCC tir Wb.K.Therie-i metetdaktsü.
Tang Nagaland sema jajaba ya election atema nübo yima jajar masü saka nübortem ajurua state nung ajuruba tebilemtsü aser tarutsü teimla indang shisalemsatepa jajaba sentong ka lir ta paisa ashi.
Tanü Hindu nunger lima Nepal-i dena par lima nung tamangba yimsü kecha menokdangi tamangner amangdaktsütsü asoshi temzüng latetogo, saka India nung BJP telokibo tanga yimsü anema inyaker ta NPCC tirisa ashi. Iba jagi BJP teloka ana küma lemsaogo aser taruba election nungbo BJP marutsü ta Congress lenirisa metetdaktsü.
Center nung ministry shia maparen ajak nung RSS nung lenirtem dang shimer, anungji BJP sorkari Khristan state-tembo meyaritsü ta Therie-isa metetdaktsü.
India temzüng nung Arla 371 nung Naga nunger nem temeten balaka agüja lir, anungji Nagaland asoshibo Nagaland tatartem dak alaka tangari sentong meyanglutettsü. ” Ni MLA-tem den külemi moutetba atema sasar saka kü tangatetba anema inyaktsü ni makok,” ta NPCC tirisa metetdaktsü.
Iba senden nung Congress lenirtem Dokiu Kecham (Gen. Secy.), Alemba Chang (Secy.), Moa Imchen (Secy.) aser Athang Chongloi (Secy.) nungertemia jembia liasü.