NPF teloki RSS-BJP ajungkettsür : NPCC

Dimapur, March 31 (TYO) : Nagaland nung taoba küm asem tashi NPF teloki RSS-BJP telok ajungketja aruogo aser Northeast nunga NPF teyari agia BJP government kümogo ta Nagaland Pradeh Congress Committee nung tir K.Therei-i metetdaktsü.
Nübortemi state government ya center government den putepa melira state government moutettsü amato bilemer aser akhi ama Special Plan Assistance aser Special Non-Plan Assistance nungi teyari talila meshia state government sentsüh aotsü bilemer ta paisa ashi.
Ajisüaka, Naga nungertemi komaka shidir shiaka Nagaland ya Christian state ta BJP teloki meteta lir aser Nagaland ama Christian state ka nem teyari balaka agütsüra RSS teloki BJP government dang tasüngdangba alitsü ta K.Therei-isa metetdaktsü.
Center nung UPA government alidang, yimten telok tsütsü kecha mereprangi government tenzükertem ajakji senso tajung kaka asünungji, 6th ROP agütsütsü atema Special Non-plan Assistance nungi sen Rs.712 crore aser Special Plan-Assistance nungi sen Rs 326 crore agütsü ta paisa metetdaktsü.
BJP Govt-i government tenzükertem tim tangutsü 4th FC award ajanga angutsü aliba dena magütsütetra asenok sobaliba aser tamangba yimsü dena lendongi aitsüsa BJP yaribaji kechi tajangzük asütsü (?) ta Congress lenirisa metetdaktsü.
RSS aser BJP nükjidongji India ajunga nung Uniform Civil Code alitsü, iba jagi kin ka, temzüng ozüng ka, tamangba yimsü ka aser tax ka dang asütsü. Kodang iba Uniform Civil Code-ji tatar senden nung latetdir, idangjibo linük temzüng arla 370 aser 371 A dak kecha balaka tashi mali akümtsü. Ibaji ataloktsü atema Rajya sabha nung BJP telok nungi tatar abensaa alitsüba mapang ka atar, ibai asenok asoshi lendong tulu asütsü ta Congress lenirisa metetdaktsü.