NPF temporary office atema atsüteper

August 12, 2017 nü Kohima nung NPF züngsemtem tejashi nung Bayavü Hill, Hotel Legacy nung NPF office tasenba nung adenshiba noksa nung angur. 

Kohima, August 12 (TYO): Hotel Legacy Kohima nung NPF Office ka lapoka alibaji August 13, 2017 tashi nung shibangang ta Honibarnü Naga Peoples’ Front (NPF) 10th Northern Angami-I Assembly Constituency-i anogo latettsüogo.
August 10 nü interim president ta ajasang Neiphiu Rio-i Hotel Legacy, Bayavü Hill Kohima nung ozüngi memelaba NPF office ka lapokba osang angazükogo. Iba ya 10-NA-I A/C telongtet kübok aiter, ta NPF 10th Northern Angami-I tir, Vilielhou Suokhrie aser tatong tir, Pfulikhrie Keditsu nati tanü sangdong ka nung metetdaktsü.
NPF nung Tir ka dang lir aser paji Dr Shürhozelie Liezietsu lir. Pa ya November 26, 2014 nü NPF General Convention nung shim aser April 30, 2015 anogo nunga pasa pusema nungit. Tir Dr Shürhozelie dak alia tanga president, interim mesüra tanga kecha mali, ta ketdangpurtemi ashi.
State yimtiba kübok Sokhriezie nung NPF headquarters lir aser Kohima nung division aser Assembly Constituency Unit office tem dak alia tanga NPF office kecha mali. Neiphiu Rio aser pa pusemertemi 10-NA-I A/C telongtet nung NPF office ka lapokbaji, onok ketdangsübaren alema inyakba aser rara menar ama lir, ta sangdong nungsa metetdaktsü.
Anungji August 13, 2017 nung mesüra matongdang NPF 10-NA-I A/C ketdangpurtemi Rio dang office shibangtsü aser hotel nung NPF wako songa aliba ajak agientsü tetuyuba agütsü. Iba tetuyuba sülen manidakra, onoki tapet mapa inyaktsü aser iba khuretji Rio-i abentsü, ta parnokisa ashi.
Honibarnü NPF 10-NA-I A/C züngsem noklang ishika Hotel Legacy, Bayavü Hill nung lapoka aliba NPF office kima adenshi aser office raksatsütsü ta amokmeren saka lennir taintemi tensa tamajung moudaktsüi azüok.
Neiphiu Rio dang office shibangtsü mapang atakzüktsüba nung meinyakba sülen ang tapet mapa inyaktsü ta tanü lungkak aitertemi telemtetba agi.
Ano külen, tanü NPF Press & Information cell-i sangdong ka nung, NPF party indang temporary office shibangtsütsü amokmeren masü tajungba ta metetdaktsü.
NPF MLA 48 nungi 36-i July 31, 2017 nü Lok Sabha MP, Neiphiu Rio NPF nung interim President asütsü shim. Chief minister TR Zeliang-i anir NPF MLA teimbai pusema nungitba ajanga Neiphiu Rio-i iba mapa agizük, ta sangdong nungsa shia lir.
NPF party indang temporary office ji Legacy Complex nung lapoka lir aser ibaji Nagaland yimtiba Bayavü Hill nung lir. NPF dena yimten telok ajaki Bayavü Hill mesüra Kohima kübok tesem mashi ka nung temporary office lapoktsü temeten lir. Iba nungji ajemdaker, Legacy Complex ali kibur dang nung temelaba meshir temporary office ji lapok aser shingaia iba office meinprongtsü makok.
NPF MLA 36-i Dr. Shurhozelie Liezietsu NPF tir ta asübaji magizüker aser iba jagi pa dang anogo 15 tsüngda tir menden toktsütsü mapang latettsüogo, ta NPF Press and Information cell sangdong nungsa metetdaktsü.
Bayavü hill, Kohima nung lapoka aliba NPF temporary office ji NPF indang ozüngi melaba office lir, kechiyong NPF MLA aser party züngsem teimbai iba office agizüker. Anungji, party office shibangang ta ashibaji magizüker aser 10 NA (1) (A/C) nungi lanur 50 kati August 12, 2017 nü office shibangang ta amokmerenbaji magizüker.
NPF indang temporary office nung meinprong mesüra teraksa kar danga atalokra, iba khuretji 10 NA (1) (A/C) lanurtemi abentsü, ta NPF Press and Information cell-isa metetdaktsü.