NPF temzüng kümzüktsü asoshi Rio o Imchen na anentsü: Dr. Shürhozelie

Kohima, May 23 (TYO) : Tawa taoba Chief minister aser tang temendak Lok Sabha nung tatar Wb. Neiphiu Rio aser taoba Home minister, Wb.Imkong L Imchen na NPF telok nungi atsüngina atadaktsüba telemtetbaji NPF temzüng kümzüka ayutsü asoshi inyakba mapa ka liasü ta tanü Hombar nü Naga People’s Front (NPF) tir Dr. Shürhozelie Liezietsu-i metetdaktsü.
“Party nung lenir shinga anema ni tamajung bilema mali mesüra Rio dena meputepba kecha mali saka Party Disciplinary Action Committee (DAN)-i pa NPF telok nungi atsüngina atatsüla ta ken o renema bener aruba nung ajemdaker paji ‘suspend’ sütsüogo,” ta tanü yangi NPF 11th Northern Angami-II Assembly Constituency nung NPF Party Office bearers conference nung jembidang NPF tiri metetdaktsü.
Northern Angami-II Assembly ya Rio adokba constituency lir aser pa 2014 May nung Lok Sabha nung tatar akümba sülen, tanük Dr Neiphrezo Keditsu nem melenoktsü.
NPF tiri Rio nem “suspension order” May 17 nü agütsü aser iba jakdang MLA teinyakdak Imkong L Imchen nem April 15 nü agütsür liasü. Tenapronglai NPF teloki aniba sorkar anema inyakba agi NPF nungi atsünginer ta NPF tirisa metetdaktsü.
” Party temzüng wazüka yutetba atema ni temulung süa dang lir,” ta Dr.Shurhozelie-isa ashi. ‘Yaküm küm April ita nung NPF lenirtem rongnung putepshitsü lemtetba lokti senden sülen parnoki NPF anema inyakba mapatem anen asübo, tang ya yamai matalokla, ajisüaka parnoki teloki maremzüktettsüa alia inyak,’ ta NPF tirisa ashi.
Rio-i NPF telok anema kecha meinyak ta langzüba ken o indang koma ta asüngdangdang, NPF DAC ajanga Rio-i NPF anema inyakba mapatem ajak tuteta asüngdangogo, saka pai itemji kecha melangzü, kechiyong pa asoshia ajaki meteta inyakba mapa ka meinyaka ta langzütsübaji tasak asü südi ta Dr.Shurhozelie-isa ashi.
Tanü iba senden nung 11th Northern Angami-II A/C nungi NPF Advisor pongoprongla dena liasü aser parnok ajaki NPF teloki Rio dak inyakba mapaji shitak inyakogo ta pusema metetdaktsü.
Kasa senden nung Rio tanük aser tang temendak MLA aser NSMDC mendenbuba Dr. Neiphrezo Keditsu-i mapang tatsüka agia jembidang, par constituency nung NPF tir aser Chief Minister T.R Zeliang nati nisung aika nem maongka tajung agütsüba asoshi pelaba metetdaktsü saka tang NPF lenirtem atsünginba dak aketba ken o bo kecha mesüok.
Iba senden temer külen osangbenertem den jembidang, Dr.Shurhozelie-i ashiba agi, ano NPF DAC ajanga MLA ana, Dr Neiphrezo aser Namri Nchang na nem ‘Show Cause Notoce” agüja lir.
NPF tirisa ashiba agi, tang NPF telok anemertemi 2018 küm election matongdangsa yimten telok tasen ka akümtsü aser ibaji onoki menokdanger.
Mongolbar nü Delhi nungi Neiphiu Rio aruba agizüktsü asoshi Dimapur nung lokti senden alitsü renemba sentong indang asüngdang dang, ” onoki iba senden nung adentsü aoer party worker mesüra lenirtem shinga menokdangtettsü saka iba ama sendenji ajanga onok den adener o madener na jangjatettsü,” ta NPF tir-isa ashi.
2018 State Assembly elections atema NPF terenemba koma ta asüngdang dang, ” tang India sorkar o NSCN-IM na tsüngda ken o lemtepba ajanga telemtetba langkabo arutsü imlar, ajisüaka onoki parnok rongnung renemba ken o ji mangu tashibo kecha meshitettsü. Anungji, parnok tsüngda kecha telemtetba ka marura, taruba election asoshi renemtsü,” ta paisa metetdaktsü.