NPF temzüng nung Interim President indang menden mali: Dr. Shurhozelie

Kohima, August 10 (TYO): Tanü taoba state Chief Minister aser MLA, Dr. Shürhozelie Liezietsu-i, party nung inyakertem aikati party toktsüogo aser parnoki parnok koleni aoerar memeteti party anema nokdakba telok nung denogo; party nungi anentsüba MLA tem den loktepba ajanga parnoki NPF party toktsüogo, ta ashi, ta tanü NPF Media & Press Bureau-i sangdong ka ajanga metetdaktsü.
Kohima nung aliba Central party office nung NPF Mokokchung Division party lenirtem den senden amendang NPF Tir, Dr. Shürhozelie-i, parnok temelung melenshia party-i meyipa marura parnokji NPF party toktsürtem lir ta züngshitsü, ta metetdaktsü.
‘Interim President’ dak sendakba nung Dr Shurhozelie-i, iba ya nüburtem ashioktsüba ka lir, kechiyong NPF temzüng kecha nunga Interim President menden indang shia mali, saka President ka aser Working President ana indang dang shia lir, ta metetdaktsü.
Tang adoka aliba mepetmesü ya khen atema dang lir, ta shia pai party lenirtem dang aremzüa atatsü aser tayongzükbatem koktettsü atema ajungshi.
Dr. Shürhozelie-isa, NPF tangatetbatem kübok inyakertem aser aser party nungi masetshirtemji tia takatiba lenirtem asütsü, ta ashiba den külemi “2018 assembly election atema party junga renema lir, aser asenok rongnung tashitait aser ochishir lenirtem dang alitsü,” ta metetdaktsü.
Paisa Mokokchung Division party lenirtem dang, party nungi ajenba telok ajanga tazüng adoka alibaji nenoki atsüngtsü, ta metetdaktsü.
Kasa senden nung MLA, Yitachu-ia, tawa assembly nung TR Zeliang indang unofficial Chief Whip ajanga Dr. Shürhozelie’er sorkar anentsüba ken oji Court nung benoka lir, aser kobi melii Court-i ochi obendang agütsütsü imlar, ta metetdaktsü.
Kobi melii court-i Dr. Shürhozelie sorkar tentetshitsü atema obendang agütsütsü, mesüra 2018 elecion matongdang President’s Rule benoktsü, ta Yitachu-isa ashi.
Yitachu-i ashiba agi, tarutsü nung Rio-i kodanga Zeliang den tangatettep tajung kati marutsü, kechiyong party anokshitsütsü atema dang Rio-i Zeliang anishir, aser pai marendaki Zeliang atsüngdoktsü.
Yitachu-isa, 2014 küm Rio-i Lok Sabha election nung takok ngur state sorkari pa Union ministry nung anioktsü atema inyak, ajisüaka hopta ka jelia T. R Zeliang-i kanga sangraa inyakba ajanga NPF party nungi Rio anendaktsü, aser ibaji ajanga Rio union ministry nung manioktet, ta metetdaktsü.
Kasa senen nung MLA, Vikheho Swu-i, party anema nokdakba teloki sen agi Naga nunger ajak alizüktettsü amai bilemer, saka Naga nungertemji sowar masü, ta ashi.
Paisa, ochi obendang agütsütsü atema mapang agitsüa akok, saka kobi melii Dr. Shürhozelie’er sorkar arutsü mesüra election matongdang PR benoktsü, ta metetdaktsü.
Mokokchung Division nungi teshimtet telokji Tir Moasungba leniba nung arua liasü.