NPF ticket amer shingaia tenüng meyipa magitsü

Dimapur, January 14 (TYO): January 14, 2017 nü NPF President, Dr. Shürhozelie Liezietsu’er kidang NPF ketdangpurtem senden ka amen.
Senden nung Nagaland nung Municipal & Town Council election dak sendakba onüktem benoka olemtep aser telemtetba kar agi, ta NPF Working President, Apong Pongener-i sangdong ka nung metetdaktsü.
Naga People’s Front (NPF) indang ticket temji party nung primary aser active membership alir nem agütsü, anungji NPF ticket amer nisung shingaia tenüng meyipa magitsü ta tanü senden nung telemtetba agi.
State Election Commission-i election agitsü sangdongba ama NPF-i election maparen inyaktsü lemtet, ta sangdong nung shia lir.
NPF ticket amertem kar parnok tenüng magütsüdaktsütsü atema telok kari tashiyim mapa inyakba atema NPF-i sasa bilemer. NPF-i Naga Hoho, ENPO, Tribe Hoho aser Nagaland nung senso ajak dang, sorkari Urban Local Bodies indang election agitsü lemtetba sülen anidaktsü mepishir, ta NPF Working President-i sangdong nungsa shia lir.