NPF Women Wing, Mkg division mendenpur tasen shimogo

 

Mokokchung, September 14 (TYO) : Hombarnü Naga Peoples’ Front, Women Wing, Mokokchung Division nung mendenpur tasen shimogo aser NPF Women Wing Central HQ tit, Tonlih Wangsa-i parnok nem tenangzükba agidaktsü.

Tanü NPF Mokokchung division tir, Moasangba Jamir-i Women Wing Mkg Division Senyur tasen kidang NPF nisan salatsü.

NPF Women Wing – Mokokchung Division mendenpur 22 tasen shima tenangzükba agiba sentong nung NPF Mokokchung division aser NPF Youth Wing, Mokokchung nungi mendenpurtem dena liasü.

Mendenpurtem tenangzükba agidaktsüba sülen tongti tesemdanger Tonlih Wangsa-i parnok dang ajemalu aser taremzük aliba den nübortem yaritsü atema alizüng yur mapa inyaktsü ayongzük.

NPF Mokokchung Division tir, Moasangba Jamir-ia NPF tetsür lennirtem dang party tangatetba nung ammeter inyaka aotsü ayongzük.

NPF mendenpur ajakji lokti atema inyaktsü shimtetba lennirtem lir aser unit balala ajak longjemer jenjang ajak nung party tashi itdaktsütsü atema meranga inyaktsüla, ta Moasangba-isa ayongzük.

Iba sentong nung NPF Women Wing Central Hq, tatong tir, T Opangla Jamir-ia o jembi.

Lai ashiba agi women wing ji party nung yimjung yanglurtem asütsüla aser party nung kongsang balala ajak sentakteptsü atema inyaktsüla.

NPF Women Wing, Mokokchung nung tir Arenla Pongen aser tongti tezülur Bendangsenla na lenisüba kübok mendenpurtem tasentemi inyaka aotsü. Senyur tasenji Mongsenbai ward, Mokokchung nungi Sakusangla lir.

NPF Central Hq-i NPF Women Wing division incharge inyaktsü atema Aphien (VP, Central) aser Abu Peseyie (Secretary, Central) na nem mapa lemzüktsüogo.