NPF ya BJP aser NDA den teyariteper tajung ka lir

Dimapur, June 21 (TYO): 1970s tatemlen nungi Naga People’s Front ya non-Congress national party den teyariteper ka ama arur aser 2003 tetenzüklen non-Congress political party tem longjemer Democratic Alliance of Nagaland (DAN) tenzükdang iba teloktep tashi itshi, ta Dr Shurhozelie Liezietsu-i tanü sangdong ka nung metetdaktsü.
DAN tentetba mapang NDA Chairman, George Fernandes-ia tenangzükba nung sign asü. Iba mapang nungi, teloktep tashitaitba küma arur aser tang NPF aser BJP den Independent MLA 7-i teyari agüja nungiter, ta paisa ashi.
Talisa, yaküm May ita North East Democratic Alliance (NEDA) tentetba nung BJP aser NPF ya telok tongtitem lir aser iba tesentaktep ya Manipur tashi raloka ogo aser idakji BJP-i aniba sorkar nung NPF MLA pezü dena lir, ta Dr. Shurhozelie-i ashi.
BJP den tesentaktep yanglubaji tajangzük mesüra tashi angutsü atema masü saka tangatetbatem nung ajemdaker yangluba lir. Northeast nung tajangzük, terenlok aser sorkar ketdangsübaren tajung agütsütsü nükjidong nung tesentaktepji ayu aser iba ya meraksai maneni aotsü, ta paisa metetdaktsü.
BJP aser NDA atema NPF ya teti teyariteper ka asütsü aser NPF ya NEDA nunga tongti telok ka asünung, NPF-i aniba DAN sorkari taruba India Tir atema NDA-i shimba nübo nem vote agütsütsü, ta Dr. Shurhozelie-isa sangdong nung shia lir.