NPF ya BJP den teyariteper tajung ka lir: Dr Shurhozelie

Dimapur, June 28 (TYO): Naga People’s Front (NPF) ya BJP den teyariteper tajung ka lir aser Naga nunger atema nokdakba yimten party ji NPF dang lir, ta Nagaland Chief Minister aser NPF tir, Dr. Shürhozelie Liezietsu-i ashi.
Northeast nung aliba regional party tem rongnung NPF ya tejenba lir aser 1977 nungi NPF-i non-Congress national party den yariteptsü tenzük. Iba tesentaktepji 2003 küm taoba NDA Chairman, George Fernandes-i anir Nagaland nung non-Congress party temi Democratic Alliance of Nagaland tentetdang akangshi, ta paisa ashi.
NPF party ya Naga nunger aliba tesemtem nungdang masü saka northeast nung tribal tesemtem ajak nung tenzüka aotsüla, ta NPF Arunachal Pradesh State Unit den senden amendang Dr. Shürhozelie-i ashi.
Bodbarnü NPF central office conference hall nung Arunachal Pradesh nungi party züngsem noklang ana dak tema adenshia lia, Chief Minister-i ashiba agi, “Naga nunger litsü ajak ka akümtsü atema takhangba agütsübaji tangbo meinyaktettsü akok, saka NPF kübok külemi longjemba ajanga Naga nungertem tangatetba nung aser yimtenren nung ka küma longjemtsü.”
Manipur aser Arunachal Pradesh nung NPF party razüka aoba ajanga state ana nung aliba Naga nungertemi kibong ka tangatetba aruogo. Taruba Arunachal Pradesh sorkar nung NPF-ia shilem agitsüla aser ibaji ajanga state nung Naga nungertem indang khurettem atema mapa inyaktettsü, ta Dr. Shürhozelie-i ayongzük.
“Yangi adenshia aliba Arunachal Pradesh nung NPF party lennirtemi, lenisüba milen amba dang masü saka nür state nung oa NPF party indang osang tajung sangdongtsüla. NPF ajangadang sorkari Naga nunger ola angashitsü ta metetdakjang” ta paisa ashi.
Manipur sorkar nung NPF-i MLA yokogo aser tang Manipur Assembly nung asenok ajitetogo. Anungji, Arunachal nunga Naga nungertemi taruba sorkar nung Naga nunger yoktsüla. NPF party-i assembly asem nung takok ngua züngsem kümtetra, national party ka ama züngoktsü, ta NPF tirisa ayongzük.
Tanü senden nung DAN Chairman aser taoba Chief Minister, TR Zeliang-ia o jembidang, Naga nunger nüngdakba aser taginübatem atema jembitsü aser inyaktsübaji NPF party dang lir, ta ashi.
Tawa tentetba Democratic Progressive Party (DPP) amala tanga Naga regional party temji Naga nunger mangmangdaktsütsü atema tentetba dang lir. NPF-i dang Naga nunger ajak atema bilemtsür aser mapa inyaktsür, ta TR Zeliang-isa ashi.
“Nagaland adena orr aliba Naga nungertemi Nagamese oshi angazüktsüla kechiyong iba jagi asenok ka küma longjemtsü atema teyari angutsü. Tanü amenba senden ya Nagamese oshi nung agiba atema kanga pelar. Oshi ajanga dang nisungtem longjemdaktsür,” ta paisa shisem.
Education Minister, Yitachu-ia ashiba agi, NPF ya Naga nunger ajak ajungkettsü atema tentetba telok ka lir.
Naga nunger atema NPF ya senmang ka lir aser party indang teinyaktsü tongtipangbaji Naga nunger aliba litsü ajak atema inyaktsüba lir, ta paisa shisem.
Senden nung Rural Development Minister, CL John-ia Arunachal Pradesh party lenirtem dang party nung kibur tangatetba alitsü aser taruba Arunachal Pradesh nung Naga nunger MLA tem shimtsü atema ayongzük.
Naga nunger state balala nung aliyonga, Naga nunger maitsü atema sabangji NPF party dang lir, ta Advisor DUDA aser Arunachal Pradesh ministerial in-charge, N Thongwang-ia metetdaktsü.
Senden nung Arunachal Pradesh NPF state unit nungi lennirtemia o jembidang, parnok Arunachal Pradesh nung aliba Naga nunger ajungkettsü atema party nung aden ta ashi.
Senden nung mendenji Advisor to Chief Minister & NPF working president, Apong Pongener liasü aser NPF vice president, Tsumongo Ovung-i temoatsü meshia sarasadem.