NPF ya Manipur tenemlen alirtem atema party : Dr. Shurho

March 02, 2017 nü Manipur kübok Chandel aser Ukhrul district headquarters nung NPF election nüboyim lokti senden ka nung Nagaland Chief Minister aser NPF Tir, Dr. Shurhozelie Liezietsu-jembiba noksa nung angur. 

Kohima, March 02 (TYO): Manipur assembly nung tenemlen aliba nüburtem nükjidong ataloktsü atema sabang ka nüngdak, ta shia Naga People’s Front (NPF) Tir aser Nagaland Chief Minister, Dr. Shurhozelie Liezietsu-i, party oren nung ‘Naga’ ta amshiaka party-i Manipur nung Hill districts ajak atema nokdaker, ta metetdaktsü.
Paisa, NPF nung adentsü atema Jharkhand tashi nungia yimtenren party kari pa ajuruogo, ajisüaka tang atemabo meilongi dang inyaktsü pai lemtet, ta metetdaktsü.
Tanü Chandel aser Ukhrul district headquarters nung NPF elections nüboyim senden nung jembidang Chief Minister-i, “tenemlen aliba district tem nung MLA 20 sabang ka nung melongjemtetba ajanga küm aika Assembly senden nung tatartemi obang ka ser mejembiteter,” ta ashi.
“Manipur hills districts nung Legislative Assembly Constituency 20 ji tesüiba küm 40 tashi tenemlen alirtem atema lir. Ajisüaka parnok yimtenren party balala nungi asüba yong Manipur Legislative Assembly-i arudang parnok o parnok na tsüngda ainer ama benshir aser iba mapang nungji parnok longjemtsü atema sabang ka malibayong obang ka ser mejembiteter,” ta paisa metetdaktsü.
“Manipur nung NPF aruba ajanga item constituency 20 nungi nüburtemi nüngdaka aliba sabang ka onoki agutsür ama bilemer. Kodang item MLA 20 iba sabang nung longjemdir, parnoki obang ka ser inyakba ajanga terenlok bener arutsü; obang ka ser adokba olaji ajanga tenemlen aliba nüburtem tejangraba kümzüka ayutsü; aser iba nükjidong nung küm ishika tejaklen onoki Manipur nung NPF amenoktsü lemtet,” ta Nagaland Chief Minister-isa ashi.
“NPF-i Naga tesemtem sendakteptsü atema nokdaker, ajisüaka asenoki democratic lenmang aser inyakyim shitak ajanga ibaji inyaktsü nüngdaker, aser iba atemaji mapang agitsü,” ta pai shisem.
NPF party nükjidongtem metetdakja pai, party-i yimjung atema nokdaker aser tenemlen aliba districts kübok lokti balala tsüngda yimjung yanglur ka ama shilem agitsü nükjidong lir, ta lemsatep.
“Hills dictrict kübok lokti balala tsüngda dang masü saka telungpur telok balala atema yimjung yanglur shilem agitsü. Asenok telungpur telok aika lir, Northeast nung telungpur telok aika lir, talisa Nagaland aser Manipur state na nung telok aika lir. Asenoki parnok indang yimtenren nükjidong ajakjibo memetet, ajisüaka parnok melongjemra parnoki kecha majangzüktsü,” ta NPF tongti lenirisa metetdaktsü.
“Anungji onok nükjidong rongnung kaji, telungpur telok balala tsüngda apu alatsü atema lir. Telok kati tanga teloktem anema rarabaji ajanga asenok nem teraksa dang bener arutsütsü aser asen sasa asenok lemsar dang asütsü,” ta pai ashi.
Paisa, telok ajak dang nüburtem atema longjemtsü aser rara anentsü mepishi.
Nagaland Chief Minister-i Congress lenir tain aser Manipur Chief Minister Ibobi Singh aija, yimtenren tajangzük atema pai lokti balala tsüngda telemsa adokdaktsür, ta ashi.
“Onoki telok balala ajak yimchiyimjung nung lidaktsüner. Onoki yimjung atema nokdaker aser maneni yimjung atema inyaktsü. Onoki kidanger ajak den yimjung nung dang liner,” ta shia pai vote agutsütsüpurtem dang NPF candidate temi takok angutsü atema vote agüjang, ta mepishi.
Ano NPF Manipur Unit in Charge aser Nagaland Minister, Yitachu-ia, “NPF-i Manipur elections nung shilem agibaji tenüng agi dang masü, saka onoki Naga yimtenren tebilemtsü atema süoki ia agir,” ta metetdaktsü.
Manipur nung Congress party-i küm aika hills district nüburtem sendoka toktsü, ta aija Yitachu-i, tang election nung Ibobi Singh ajanga Congress-i tamakok angutsü, party-i Naga yimjung maparen anema inyakba mapatongtem aser tribal nübur anema inyakba mapatongtem ajanga parnoki tamakok angutsü, ta shisem.
Manipur nung assembly election shilem ana lemsar March 4 aser March 8 anogotem nung agitsü.