NPF Youth Wing-i Angh, CM & Speaker anema poster campaign tenzüker

Kohima, July 28 (TYO): Taoba Chief Minister Dr Shurhozelie Liezietsu-i aniba sorkar chidaktsüba atema tejashi sayua Naga People’s Front (NPF) Youth Wing-i Nagaland Angh P B Acharya, Chief Minister TR Zeliang aser Assembly Speaker Imtiwapang Aier nungertem anema poster campaign ka tenzükogo.
Angh Acharya-i July 19, 2017 nü Dr Shurhozelie’er sorkar anendaktsüba aser TR Zeliang chief minister kümdaktsüba ajanga India Linük Temzüng ajembangogo ta aija NPF Youth Wing-i ‘Angh, Yimlibilema India Linük Temzüng züngang’ ta shiogo.
Hokolbarnü NPF Young Wing-i Kohima jila aser Highway tem nung poster tem yutsüba nung, “Angh Acharya aser Speaker Imtiwapang Aier kübok Democracy ajembanga lir”, “Shinga tsütsü mashiba Angh ka onoki aginür”, “Angh, nü indang RSS tangatetba ajanga politics temenentsü” ta zülua lir.
Naga nungertemi sorkar tajung ka alidang Naga yimten tebilemtsü latetnür saka Angh-i iba yimjung maparen raksatsütsü meranger. Anungji, Angh Acharya-i Nagaland nung sorkar tajung chidaktsüba atema India Tiri pa anentsütsüla, ta NPF Youth Wing-i takhangba agütsü.
NPF Youth Wing-isa Chief Minister Zeliang dang pa Chief Minister akümtsü atema MLA tem tashioktsü ta metetdaktsü.
July 8, 2018 nü TR Zeliang-i Dr Shurhozelie atsüngdoktsü mapa inyaktsü tenzükba aser parnok (NPF MLA 36 aser Independent MLA 7) Kaziranga, Assam nung mungzüker NPF sorkar ka akümtsü takhangba agütsüba ajanga NPF sasep nung mepetmesü tuluka adok.
Angh-i Dr Shurhozelie dang July 15 matongdang Assembly nung vote of confidence agiang ta July 11 aser 13 anogotem tetuyuba agütsü, saka July 14 nü Dr Shurhozelie-i interim stay order ka angu.
Ajisüaka, July 18 nü okadaki Dr Shurhozelie indang petition magizük aser Angh dang pa tangatetba agi telemtetba ka agitsü nungloktsü. Iba sülen Angh-i Dr Shurhozelie dang majority sayuang ta shia July 19 nü Assembly indang emergent session ka jazük, saka Dr Shurhozeli-i shilem magi. Iba jagi Angh-i TR Zeliang chief minister asütsü shim.
July 21 nü MLA 47-i pusema TR Zeliang-i assembly nung majority angu aser July 24 tashi nung Council of Cabinet Ministers shim.
Ajisüaka, NPF sasep nung iba ken o metembangi lir aser NPF Party President Dr Shurhozelie-i NPF MLA 31 tashi party nungi züngdokogo aser pa pusemba NPF MLA 10-i okadak TR Zeliang’er sorkarji temzüngi memelai aküm ta ken o ka benokogo.
Iba ken o ji July 31, 2017 nü Supreme Court nung angadangtsü anogo lateta lir.