NPF Youth Wing-i nashishi benjung ayongzüka amung

Angh-i Dr Shurhozelie’er sorkar atsüngdokba anema Hokolbarnü NPF Central Office nung nashishi benjung ayongzüka amungdang NPF Party züngsemtem shilem agiba noksa nung angur. (Kohima, July 21)

Kohima, July 21 (TYO): State Angh-i ‘political coup’ inyakba anema Hokolbarnü NPF Central Office, Kohima nung Naga People’s Front (NPF) Central Youth Wing-i nashishi benjung ka ayongzüka agiogo.
Iba benjung nung party züngsem aika arua aden aser NPF Youth Wing-i nashishi tapu balala nung renema chiyungdaktsü.
Ano, NPF Youth Wing President Vihoshe N. Swu aser Working President Bendang Longkumer nati Angh dangi züluba shidi ka nung “Akhümtsübua aliba lennir, na tesüiba anogo ishika Nagaland nung nür BJP den medemer sorkar ka tentettsü atema democratic telatetba ajak alema yimten mapa inyakogo” ta zülua lir.
“Angh indang office ji yimten telok kecha tsütsü mashila aser yimten mapa nungi pila alitsüla, ajisüaka nai NPF telok nungi pilaa aoba telok indang lennir ka ama inyakogo” ta NPF Youth Wing-isa Acharya dangi shidi nung metetdaktsü.
NPF nungi küm trok atema züngdokba MLA ka Chief Whip inyaktsü mulunga agizükba ajanga Acharya-i democracy inyakyim raksatsüogo. Parnok züngsemba yimten telok kati memeteti, parnok sasa Chief Whip shimba MLA tem rongnung Acharya-a züngsem ka liasü aser iba ya parliamentary putiotsü nung kodanga meinyakdang mapa tasen ka lir, ta parnokisa ashi.
“Naga nungertem ya taremzük aliba nübortem lir saka aremzükba jia telatetba ka lir. NPF-i BJP den tesentaktep pilaba atema onok dang ya pelatepba mapang ka lir. Tesüiba anogo ishika tsüngda, nai yimten aser tamangba yimsü alizüng tongtettsü atema kanga ajemzüka alua inyaksangshiba kuli yimjak nung sayuogo” ta NPF Youth Wing-isa Angh dang ashi.
Acharya-i yimten mapa inyakba benjungtsü aser ano NPF-i BJP den tesentaktep pilaba atema onoki nashishi benjung ayonga amunger, ta NPF Youth Wing-isa metetdaktsü.