NPGN/NNC (NA)-i telemtetba shidak agiogo: GPRN MIP

Dimapur, December 05 (TYO): India-Naga yimten ken o ajaki akhümketa agizüktettsüsa latettsü asoshi lenisüba tajung nüngdaker aser ajioda Naga Chief Negotiator, Th. Muivah-i Government of India (GoI) den tejembidak lir, ta GPRN MIP sangdong ka nung metetdaktsü.
“Asenoki iba jenjang ya atangji mangatetra Naga linük anema inyakertemi asenok amshitsü aser jenjang raksatsütsü. Parnok aibelen nung lendong angateta aser Naga nunger atema nüngdak ta angateta NPGN/NNC (NA)-i telemtetba shidak agiogo. Ajioda onoki NPGN/NNC (NA) President, T. Ovung pelaa agizüker,” ta sangdong nung shia lir. “NPGN/NNC (NA) President, T. Ovung-i telemtetba agia Ato Kilonser aser Chief Negotiator, Th. Muivah dang shidi ka ajanga NPGN/NNC (NA)-i NNPGs WC toktsüogo aser August 3, 2015 nü New Delhi nung India sorkar aser National Socialist Council of Nagalim (NSCN) na tsüngda agiba Framework Agreement pusemtsü ta metetdaktsü. NSCN/GPRN-i iba ya yimtenren tsütsü shisa kaa telemtetba tajung agiba ama züngshir,” ta kasa sangdong nung shia lir.
Iba dak alia pai Ato Kilonser dang iba onük ya süoki ia agitsüla aser Naga yimtenren ken o nung NPGN/NNC (NA) dendaktsütsüla ta mepishiogo, ta sangdong nungsa shia lir.
Naga nunger atema tang tejembidak India-Naga yimtenren ken o dang tongtibangba kecha mali, anungji Naga nungeri longjemer iba ya junga angatettsü nüngdak, ta GPRN-isa metetdaktsü.