NPMHR-i 38buba Foundation Day among

Dimapur, September 11 (TYO): September 9, 2016 nü Republic of Hiyo, Dimapur nung Naga Peoples’ Movement for Human Rights (NPMHR)-i  38buba Foundation Day mongogo, aser iba sentong nung iba telok tenteter züngsem kar- Labu Sakhrie, Luingam Luithui, P.S Lorin, Gugs Chishi, Hokiye den South Sector aser Delhi sector nungi NPMHR züngsem aika dena liasü.
Iba anogomung nung Secy. General, Neingulo Krome-i NPMHR putiotsü tatsüka lemsatepdang pai iba telok tenteter züngsemtemi bendanga inyakba indang lemsatepba den külemi sepaitemi meimchir dak mapetba jenti inyakba ajanga meimchir temeten atema inyakba tali tashi itshidaktsü, ta shia meimchirtem temeten atema tangalen nungia teyari meshitsü nüngdak, ta metetdaktsü.
Loktiisa iba telok tenteter züngsem, asür Ahu Sakhrie nem akhüm agüja minute ka mokrema liasü. Delhi nung NPMHR tentetba bilemteta Hokiye-i, “Iba ya hostel tem nung o lemtepba tila ka nungi tenzük, kati ka ajurua o lemtep, meimchirtem temeten anema inyakbatem anema nisungtem longjem,” ta ashi.
“Supreme Court nung benokba mezüng tentet rongnung NPMHR dena lir, aser iba ya sayatenya ka ajanga tentetba masü, saka mapang talangka o lemtepa aruba nungi tenzük,” ta paisa ashi.
Kasa sentong nung NPMHR tenteter züngsemtem- Luingam Luithui aser Dr. P.S Lorin natia NPMHR tentetba otsü aser iba ya ajanga Naga lokti aser bendangertema kongshiba indang lemsatep.
Iba telok tenteter züngsem- Labu Sakhrie aser Gugs Chishi nati akhidang iba maparen nung parnoki ajangshibatem lemsatep. Gugs Chishi-isa pai mejemba ken “My Home Country” ajanga lokti jangratemdaktsü, Labu Sakhrie-i akhidang Delhi nung NPMHR atema nüngtugu ken Trade Union Song “Joe Hill” tena liasü.