NPMHR-i A.N. Shimray Tihar jail nungi chioktsü mepishir

Dimapur, Sept.27 (TYO) : National Socialist Council of Nagalim (NSCN-IM) nung Foreign Affairs maparen nung tongti, Wb. Anthony Ningkhan Shimray pur Tihar Central Jail nung puoka ayuba sülen tanü Deobar nü küm pongo ajungba anogo nung Naga Peoples Movement for Human Rights (NPMHR) teloki pa bilemteta sarasadema amonger aser paji chioktsüla, ta temepishiba ken o ka metetdaktsüogo.
NPMHR telokisa ashiba agi, taküm küm August 3, 2015 anogo nung India sorkar o NSCN-IM telok na tsüngda Naga yimten ken o telemtetba kati arutsü asoshi renemba tamendakdak onük nung tang tashi Naga nunger linük tenzükertem tepuokdak nungi chioktsü asoshi yimjung lenmang yangluba kuli kecha mangur. Iba ama mapang ka nung India sorkari yimten mapa inyakertem aser meimchir temeten asoshi nokdakertem shirnoksa puoka lir, itemji tepuokdak nungi chioktsü asoshi telemtetba tajung ka agitsü imlar, ta NPMHR telokisa metetdaktsüogo.
Naga nunger linük tenzükertem chioktsübaji India sorkar asoshi tim mapa ka asütsü, iba jagi taoba mapang India sorkari Naga nunger anema inyakba maparen metongshia yutettsü. Yimten mapa nung inyaker puoka ayuba aser meimchir temeten asoshi inyaker (Human Rights activists) arishiba mapatem jagi yimten maparen nung haihaura katepa moutettsü, anungji kecha telatetba ka meyui linük tenzükertem puoka ayubaji chioktsüla, iba jagi dang yimjung mapa takok ngua inyaktettsü, ta NPMHR telokisa metetdaktsüogo.
Tang Tihar Central Jail nung puoka alisang, Anthony Ningkhan Shimray ya India sorkar den Naga yimten ken o jembiba senden nung NSCN-IM tenüng nung tesem balala nung tenetben dena liasü. Pa ya September 27, 2010 küm Kathmandu International Airport nung apu. Iba mapang pa ya September 29, 2010 anogo nung India sorkar o NSCN-IM na senden nung adentsü asoshi New Delhi-i aotsüba liasü. Ajisüaka, pa pur anogo pongonü buba nungang National aser International Human Rights teloktemi anung marem pa apuba osangji India sorkari metetdaktsü.
Anthony N Shimary pur külen kuli meliaka, paji raraba osettem bener arutsü inyaktepba aser India anema tongpang ayongzükba onüktem nung tai nunglokja Tihar jail nung ayur. Iba denji ano pa anema agüja aliba tejen ken o kar nungi paji jenshia senzür ka liasü ta dena aija lir. Ajisüaka, India ozüng amshia pa anema akhi tejen keno benoka jembitsübaji tang yimten ken o jembitsü asoshi tangatettep yangluba maparen agi memelar ta NPMHR telokisa metetdaktsü.
Anthony Shimray pur tepuokdak ayubaji tang NSCN-IM aser India sorkar na tsüngda cease-fire agreement yangluba anema asütsü, kechiyong iba tangatettep ken o jagi NSCN purtem senzütsü melaa lir ta parnokisa ashi.
Anthony Ningkhan Shimray ya ochishir ka lir aser paji tang yimjung ken o jembiba maparen nung kanga nüngdaker, anungji paji chioktsü mepishir ta NPMHR teloki India nunger lenir aser nübortem dang mepishia metetdaktsüogo.