NPMHR teloki India sepaitem mapa aitsür

Kohima, July 21 (TYO): Naga nunger linük tenzükertem India den yimjung nung ken o jembia telatetba ka arutsü merangba mapang asünungji, aiben tejashitsü mapatem atalokaka Naga Peoples’ Movement fot Human Rights (NPMHR) teloki aremzüka ola madoki arur, ajisüaka India sepaitemi Naga nunger taküm züngshia melii inyakba mapatem ngua ola adoktsüsa akümer ta tanü sangdong ka nung NPMHR teloki metetdaktsüogo.
Tawa India sepaitemi Naga nunger taküm  samatsüba tatalokbatem rongnung kaji Phek district kübok Wuzu nung school tanur ana kasetba mapaji asütsü, ta NPMHR telokisa metetdaktsü.
Tamalena Phek district nungsa 14 Assam Rifles-temi Bible Hill ta ajaba tesem ka ajanga English oshi jembia sepaitem aliba tesem ajanga süiba atema school tanurtem merenshiba otsü lir ta NPMHR telokisa metetdaktsü.
Taoba ita June 23, 2016 nüa Uttar Pradesh state kübok Bareilly nung Naga nunger asangur ka tenüng agi Vezota Vasa, Jat Regiment nung inyaker ka par medemertemi tepset ama par tsüraburtemi agütsüba kulitem ajanga sayur. Aji oda, kinungertem mali postmortem agiba aser kinungertem tonga marudang mang merüktetter aliba mapatem ajak jagi temulung malemtsüsa adoker ta NPMHR telokisa metetdaktsü.
Item lendong timtem agütsüba dak alaka ano India nunger sepaitemi Naga nunger aienlen senzürtem mitba aser kidang alirtem dena nisungtem amokmerenba mapatem inyaker aser ano külen Naga nungertem mesüzüka alima dang parnok junger ta sayutsü atema mapa tajungtem inyaktsür, ta NPMHR telokisa aitsü.
Item ama timtem reshikangshi nungi Naga nungertem jenbua alitsü asoshi Naga lima nungi India nunger sepairtem anir oa adoktsüla ta parnokisa takangba ka agütsüogo.