NPP Block Committee tir BJP nung aden

Tura, Aenjeti 10 (Agencies): National People’s Party (NPP), Bajengdoba constituency NPP Block Committee tir yashi party nungi anenba ajanga party pur kanga akoksaogo.
Rakman Ch Marak, NPP nung küm aika tenzüka aru, Pa yashi Bharatiya Janata Party (BJP) nung officially maden tsüngda, NPP nungi anentsüba atema temelaba meshiba shidi North Garo Hills district tir nem agüja liasü.
Rakman den külemi pa sülen anidakertem kar Resubelpara Jonglapara nung BJP tir, Shibun Lyngdoh den Assam nung BJP nungi Garo nunger MLA, Numal Momin matsüngdang BJP nung dena liasü.
“Meghalaya nung terenlokbener arutsüba atema BJP-i yimsü asütsü nüngdaker, ta onoki amanger, anungji iba ajanga onoki BJP nung dena taruba election nung parnok yaritsü asoshi telemtetba agiogo. Temelenshi ka bener arutsüba mapang tongogo,” ta Marak-i NPP toktsüba kuli asüngdang dang ashi.