NPP candidate aser party tenzükertem telungjem senden ka amen

Mokokchung| Tsüklai 10 (TYO): Küptoknü National People’s Party (NPP) Mokokchung Division-i ayongzüka tang aruya aliba 13 buba Nagaland Legislative Assembly election dak sendakba nung nübuyimba maparen tenzüktsü asoshi Mokokchung district nungi NPP candidate-tem den telungjem senden ka party office nung menogo.
Tanü iba senden nung NPP Mokokchung Division tir I.Bendang Jamiri anir par külem party tenzükertem den Mokokchung district nungi NPP candidate-temi shilem agia liasü. Mokokchung district nungi NPP ticket angurtemji; 22 Arkakong A/C nungi Imnatiba, 25 Mongoya A/C nungi S. Supongmeren Jamir, 28 Koridang A/C nungi T. Chalukumba aser 29 Jangpetkong A/C nungi Dr. K. Chuba par pezü lir.
Iba senden temer külen osangbener den jembidang, NPP telok ya asür Purno Agitok Sangma (P.A Sangma)-i tribal nisung aser tongtibangsa North-East region nübur jenjang ajungkettsütsü aser tangar den lirumedema aotsü nükjidong yur tenzükba lir, aser Nagaland nung iba party ya Dec 2, 2017 nü tentet aser Mokokchung nunga Jan 20, 2018 nü office mesemtet, ta NPP ketdangpurtemi metetdaktsü.
Iba telok yagi kecha tamangba yimsü manemer saka ‘kaketkeno aser education’ ajanga lokti nung teraksa aliba yanglushia alima melenshitsü nükjidong yur maparen balala inyaker, iba telok ya Punjab aser Kerela tashi nung moraloka ogo aser iba ya tongtibangsa North-East region nung nüburtemi saklokba party ka lir, ta parnokisa shisem.
Nagaland songjen nung NPP ticket nungi nisung 26-i tokteptsü, item rongnung tetsür ana densema lir (Mayangpula Chang-53 Noksen A/C aser Wedie-ü Kronu – 3 Dimapur III A/C). Parnok rongnung nisung 10 dak temai takok angutsü imlar aser sorkar akümba teloktep nung adentsü, ta NPP Mokokchung Division tir, I. Bendang Jamir-i ashi. “Iba party ya tasen asünung ano tarak kecha maket, anungji, nüburtemi ajung-majung metettsü atema khen menakdangtsüla (taste südangtsüla)”, ta paisa ashi.
Tanü Nagaland ya teraksa aser ochi mashi agi süngogo, iba ama tensa ka nung NPP aruba ya mopung tasen ka aru ama asütsü, kechiyong mopung tamajungtemji iba yagi punger aotsü onoki imlar, ta NPP ketdangpurtemisa ashi. “Yimjung aser terenlok atema nüburtemi iba party nem vote agüjang” ta parnokisa ayongzüka liasü.