NPP candidate O. Tinu Lkr samar bushir

Mokokchung, March 27 (TYO): 26 Aonglenden Assembly Constituency Bye Election nung National People’s Party (NPP) ticket nungi aitsü atema nomination file asüsang candidate O. Tinu Lkr samar manguba agi, iba dak sentakba nung Mokokchung District NPP party-i Mokokchung Police Station I nung FIR agütsüba osang ajanga angazüker.
Iba osang angashir iba osangbeneri Mokokchung District NPP tir, I. Bendang Jamiri den jembidang, March 26 nü O.Tinu Lkr samar manguba agi iba dak sentakba nung FIR agütsüogo, ta pai ashi. “Pa ya pur alitsü ama onoki arendaka/temulung melemi bilemba agi FIR agütsü”, ta I. Bendangisa ashi.
Iba osangbenerisa Mokokchung District NPP tir dang O. Tinu Lkr withdraw asüba indang osang metetnüa asüngdangdang, “pa withdraw asüba indangbo kecha mangazük”, ta langzü.
O. Tinu Lkr supporter ka den iba osangbeneri jembidang, “pa nomination file sür külen samaba tang tashi kecha osang mali, phone-a switch off nung dang lir aser pa withdraw asüba indanga onok dang kecha mashi”, ta ashi.
Iba osangbenerisa Mokokchung Deputy Commissioner, Rajesh IAS den jembidang, tanü (March 27, 2019) tashi nung 26 Aonglenden A/C bye election nung tokteper candidate shingaia withdraw asüba chitti agüja mali, ta osang jangjaogo. Candidate kari danga election nung metoktepnüra withdrawal atema last date-ji March 28, 2019 tashi lir.

You must be logged in to post a comment Login