NPP-i CAB, aluyimertem aser lanur atema inyaktsü: Hayithung Tungoe

Kohima, March 26 (TYO): Nagaland Lok Sabha elections atema National People’s Party (NPP) candidate Hayithung Tungoe-i Citizenship Amendment Bill (CAB), aluyimertem yaritsü aser zünger mapa manguba lanurtem yaritsü onüktem jembi.
Lok Sabha menden nung takok ngura Naga yimten tebilemtsü latettsü atema mapa inyaktsü, ta paisa nangzük.
Hayithung Tungoe dang H Bill Lotha ta ajar aser pai Bethharan nung osangbener den jembidang Nagaland nung taruba Parliamentary election ya taoba mapangtem dang nungi khenyongi balaka asütsü.
Ni Nagaland aser North East nung alirtem dang CAB nung lendong keta aliba osang metetdaktsünür, ta Hayithung-i ashi.
“North East nung tang ozüng alema arua alir nisung lakh 2-3 shi lir saka kodang CAB mapa küma inyakdir, Bangladeshi nunger lakh 5-10 tashi ka arutsü aser parnok Assam nung mezüng arua jenoktsü” ta pai metetdaktsü.
“Nagaland, Arunachal aser Mizoram ama state tilatem Bangladeshi nungeri asüngtsü aser iba ajanga asenoki timtem tulu ajurutsü. CAB ya mapa küma inyakra, küm 10 shi ka lir Bangladeshi Chief Minister ka adoktsü ana nung lir,” ta Hayithung-i tebilemtsü ka lemsatep.
NPP president aser Meghalaya Chief Minister, Conrad Sangma-i North East nunger meimba sayua CAB anema tongti süa noktak. Rajya Sabha nung CAB mebenoktsü atema pai tongtipang shilem agiogo, ta paisa shisem.
NPP ya lisopur dak rangloker tentetba telok ka lir aser iba jagi ni iba party nungi tokteptsü jangra. Election nung takok angutsü atema Tsüngremi sayatenya mapa inyaktsü ta imlar, ta Hayithung-isa metetdaktsü.
NDPP candidate Tokheho Yepthomi-i kümsük tanabuba atema tokteper saka Parliament nung CAB benoka o atsütepdang pa samadok. Tokheho ji parliament nung North East nungertem atema noktaka jembitsüba liasü saka pa Zunheboto district nung mazüngi sentong ka nung aden, ta paisa ashi.
“Pai NE nunger meimer süra kechiba parliament-i mao aser kechiba CAB anema mejembi” ta paisa asüngdang.
“Ni NPP candidate ka takok ngura sen crore annual MP fund ji Nagaland kübok districts 12 nung lakh 40 kasasa lemsa agütsütsü. Tanüngba lakh 20 ji aluyimertem aser lanur entrepreneurs nem agütsütsü” ta Hayithung-i ashi.
“Party aser ni MP fund nung teka maitsü saka Nagaland nung public nem agütsütsü” ta paisa nangzük.
Paisa pa indang itasen aser bonus ajak agi Nagaland nung zünger mapa manguba lanurtem yaritsü ta ashi.
Naga yimten tebilemtsü atema onoki inyaktsü, ta NPP candidate-isa shisem.
March 27 nü Wokha district nungi nüboyimba sentong tenzüktsü, ta paisa metetdaktsü.
Tawa NPP MLA ana NDPP nung adenba aser PDA sorkar nung parnok adentsü asü masü ta osangbenertemi asüngdangdang NPP Nagaland general secretary (IPR), Ricky Ozukum-i iba atema tekaratiba nung osang metetdaktsütsü ta langzü.
Iba sentong nung NPP Nagaland working president Ringo Odyuo dena liasü.
NPP-i tang mezüng atema Nagaland Lok Sabha election nung tokteper. Taoba Assembly elections nung parnoki mezüng shilem agidang menden ana nungi takok angu saka March 20, 2019 nü parnok indang MLA ana- L Khumo aser Imnatiba na NDPP nung aden.