NPP-i Nagaland assembly elections atema renemer

Dimapur, February 4, 2022 (TYO): Sangküm Nagaland state assembly elections nung National People’s Party (NPP)-i tashi itshir tokteptsü osang metetdaktsüogo.

Arunachal Pradesh MLA aser NPP president Mutchu Mithi-i iba osang ya Dimapur nung osangbener den jembidang ashi.

MLA Mithi ya Nagaland nung party osang agiteptsü aser sangküm assembly election atema asalentong renemtsü atema aru.

“State shia indang regional maitsü atema külem sabang ka nüngdaker. Nagaland nung tanga regional party temji state nung dang lir. Onoki Nagaland nunger taginübatem atema sabang tuluba nüngdaker ta angateter anungji onok tsüngsü tuluba kümnür” ta MLA Mithi-i ashi.

NPP atema dang masü saka North East state ajak atema Nagaland ya kanga tongtipang lir. Nagaland nungeri tamangba yimsü den pei regional maitsü nung akangakanga noktaker aser shinga dak metaloka mali, ta paisa metetdaktsü.

“Nagaland aser Arunachal Pradesh nung elections mapang sen aika endoker aser ibaji political party ajaki meteta lir. Iba senotsü amshiba sobaliba anentsü ateam asenoki tashishitsü maliba sorkar kü nüngdaker. Nagaland aser Manipur nung onoka sorkar nung denra, sorkar ketdangsübaren nung tashishitsü melii inyaktsübaji onok indang tongtipangtiba mapa lir” ta MLA Mithi-isa ashi.

Nagaland nung assembly elections atema tangbo candidate kiw ka asütsü’ar ashitsü makok. Ajisüaka, party inyaksangshi tenzükba sülen ang onoki lemtettsü, ta paisa shisem.

Manipur aser Nagaland nung election jakdang tanga party tem den tesentaktep yanglutsü atema tamasa NPP tashitait kümdaktsütsü nüngdak, ta paisa metetdaktsü.

“Nübortemi Indian politics indang putiotsü angatettsüla. Northeast region nungi party ka dang national party kümogo aser ibaji NPP lir. Northeast nungeri party tangatetba agizükba ajanga iba ya tongtet anungji onoki iba ya tejakleni anir onür aser iba ajanga tanga national party tem dang nungi onok balaka lir” ta Arunchal Pradesh MLA Mutchu Mithi-isa ashi.