NPP-i Northeast nunger atema noktaktsü

Shillong, July 11 (Agencies): Northeast sensotem bendanga amshiba anema raratsü ta National People’s Party (NPP)-i Honibarnü telemtetba ka agiogo.
Honibarnü NPP indang digital conclave ka agidang iba telemtetba agi.
“National People’s Party (NPP)-i asen linük tenzükertem tangatetba nung amanger aser ibaji asen linük ya temeyoktep nung telongjem tangatetba lir” ta NPP-i metetdaktsü.
“Linük kübok tesem balala nung Northeast sensotem bendanga amshiba aser mezüngmeshiba anema onoki noktaker aser linük ka akümtsüba aser kati ka akhümtsübuteptsü atema onoki inyaktsü” ta parnokisa ashi.
North East Region nungi National jenjang nung party ka ama, onoki kin, sobaliba, tesem aser tamangba yimsü kecha tebendang melii North East sensotem atema noktaktsü lemteter” ta NPP-isa metetdaktsüogo.
Tanü agiba Digital Conclave nung NPP National President Conrad K. Sangma, national secretary tem- James K. Sangma, Mutchu Mithi, Lalrintluanga Jahau, Sashank Ghatraj, aser Thomas Sangma nunger den Assam, Arunachal Pradesh, Nagaland aser Mizoram tirtem aden.