NPP lennir James Sangma-i Dimapur semdanger

Dimapur, October 18 (TYO): Dimapur nung party lennirtem den ajurutepa senden ka amentsü atema National People’s Party (NPP), national general secretary (Finance) James Sangma tanü aruogo.
James Sangma ya Meghalaya nung home minister inyaker aser pai ashiba agi, national lennirtemi Nagaland nung party dak sendakba maparen reprangshimtsü tuyuba ama pa aru.
Pai Dimapur semdangba ya official masü saka party maparen atema dang lir, ta paisa shisem.
NPP-i northeast nung alirtem atema maneni inyaktsü aser party national jenjang nung regional taginüba atema noktaktsü, ta tanü NPP office nung James Sangma-i osangbener den jembidang ashi.
Nagaland nung NPP MLA anati Nationalist Democratic Progressive Party (NDPP) nung adenba atema asüngdangdang “politics ya tzü ama dang lir aser teti melenshir saka iba ajanga party inyaksangshi nung tenokdangtsü kecha magütsür” ta pai langzü.
Tanü NPP, national secretary (Org.) Dr. Lalrintluanga Jahau aser NPP, national general secretary (Political Affiars) & Arunachal Pradesh MLA Mutchu Mithi nati Sangma meiner aru.