NPPC Ltd shia arudaktsütsü atema lemzüktsüba sen tim mesüi amshi

Dimapur, October 04 (TYO) : October 02, 2015 nü Tuli jila nung Tuli Area join council Forum aser Nagaland Pulp & Paper company Ltd (NPPC) workers Union ketdangpurtem arok council senden ka amendang NPCC Ltd shia arudaktsütsü atema sen lemzüktsüba tim mesüi amshiba atema o lemtepogo.
Iba senden nung, NPCC Ltd shia arudaktsütsü atema September 17, 2007 nü Heavy industry & public Enterprises Govt. of India Ministry-i Rs 54.60 crore (Rupees fifty four crores and sixty lakhs) lemzüktsü, saka iba sen tim mesüi amshiba onük benoka jembi, ta Tuli Area Joint Council Forum (TAJCF) Tir, Benjung Jamir-i sangdong ka nung metetdaktsü.
Anosa, Nagaland pulp & paper company Ltd shia arudaktsütsü asoshi mapa tenzüktsü atema September 19, 2013 nü India sorkari Hindustan paper corporation nem Rs 100 crore (Rupees one hundred crore only) agütsü, ta sangdong nungsa shia lir.
India sorkari sen lemzüktsüdang Hindustan paper corporation nem tetuyuba kar agütsü aser itemji, Company-i iba atema sen agizüka agütsütsü asoshi Ministry nem per-receipted bill agütsütsüla, sen lemzükbaji tanga mapa asoshi mamshitsü aser sen tangalen aoba mesüra tim mesüi amshira ibaji CMD, HPC khuret asütsü aser sen junga amshitsüji CMD, HPC khuret asütsü, ta TAJCF-i sangdong nung shia lir.
Maneni kasa tetuyuba nungsa, Company tem Act kübok lateta aliba alema inyakra iba khuretji CMD, HPC-i abentsü, India Tir tenüng nung company-i 10,00,000 (Ten lakh only) ordinary shares agütsütsü aser share shia indang jenjangji Rs. 10001 asütsü, Ministry of Finance (DEA) telatetba nung aliba ama iba sen nung interest subsidy bill atema Drawing & Disbursing officer, Ministry of heavy Industries & public Enterprises, Department of heavy Industry-i Drawing & Disbursing Officer ama inyaktsü, Ministry of Finance nung lateta aliba ama, aser senotsü agütsüba anogo nungi küm ka tsüngda iba senotsü amshiba certificate ji iba ministry nem HPS-i duplicate certificate agütsütsü shia lir.
Ajisüaka iba senji Nagaland Pulp & paper company Limited (NPPCL) aser state sorkari memeteti tanga paper mill tem dangi ogo, ta TAJCF-i sangdong nungsa metetdaktsü.
Anungji Tuli Area Joint Council, General public aser NPPCL workers union-i Nagaland Pulp and Paper Company Limited dak sentakbatem onüktem ochi temeten atema RTI Act 2005 mesüra okadak benoktsü atema Social Worker aser Tuli A/C nungi taoba Congress candidate, I Chubatangit Jamir nem mapa nungloktsütsü lemtet, ta TAJCF Tir, Benjung Jamir-i kasa sangdong nung metetdaktsü.