NPPEHA-i nüburtem nem temelungjang tashitak indang rajemdaktsür

New Delhi, November 27 (Agencies): Kibongtem dang temelungjang tashidak nokdangtsü atema tesayuba agütsütsü asoshi National Programme for Prevention and Eradication of Heart Attack (NPPEHA) tentetba sülen parnoki mezüngbuba ita ana nung nisung 6000 nem iba tashidak indang rajema kümdaktsüogo.
Iba programme ya September 28, 2016 nü tenzük aser temelungjang tashidak den sentakba indang nisung crore 6 nem rajema kümdaktsütsü nükjidong lir. Parnok nükjidongji linük tesem ajaklen nungi osang tejangja bendentsü aser angati bio-medical analyses agütsütsü atema lir.
Medical statistics ajanga ashiba agi, temelungjang tashidak agi anogoshia nisung 9,000 shi asür – iba tetezü second 10 shia temelungjang tashidak agi nisung ka asür. Item rongnungi nisung 900 bo arishi küm 40 ser tekübokpurtem lir.
Iba dak sentakba nung camp balala ayongzüka nisung jenti adenshia temelungjang check-up agia liasü aser “Hriday – the Edu Vaccine” documentary nungi iba tashidak indang angazüka liasü.
“India nung kümshia temelungjang tashidak agi nisung lakh 30 dak tema asür, aser tang India nung temelungjang tashidak balala buludang, nüburtem nem iba indang mangatetdaktsüra iba dang nungjagi tamajungba akumtsü,” ta NPPEHA campaign nung densema aliba, Science & Art of Living (SAAOL) nung Non Invasive Cardiologist, Bimal Chajjer-i metetdaktsü.