NPR inyakyim atema kuli kaket kecha memeshitsü

New Delhi, Tsüklai/February 4 (Agencies): National Population Register (NPR) update asüba mapang kuli kaket kecha memeshitsü aser iba inyakyim mapang Aadhaar number meshiba ya pei mulungka nung agütsütsü, ta Sorkari Mongolbarnü jangja jangja metetdaktsüogo.
NPR inyakyim asoshi renemshiba nung tebilemtsü aliba state tem den sorkari sensaksemdar. NPR update asüba mapang kibong aser jurila osang tejangja bendentsü.
Union minister of state for home Nityanand Rai-i, NPR 2020 uptate asüba inyakyim atema enumerators aser supervisors asoshi instruction manual renemogo aser parnoki pei akokba tashi nüburtem nem NPR indang teratet agütsütsü, ta ashi.
“NPR update asüba mapang kuli kaket kecha memeshitsü,” ta pai tezüluba nung telangzüba agütsü.
Minister-isa, NPR uptate asüba mapang nisung shinga indang lisopur jenjang masadangtsü, ta ashi.
NPR inyakyim ya 2021 Census atema kilen züngoksemba den repsema linük ajunga nung benoka April 1 nungi September 30 2020 nü tashi inyaktsü.
“NPR inyakyim kübok kibong shia dangi tua kibong aser jurila osang tejangja agitsü. Nüburtemi osang tejangja agütsütsü nüngdaker. Aadhar Number pei mulungka nung sarutsü,” ta pai ashi.
“NPR ya mezüng 2010 küm renem aser 2015 küm update asü. Citizenship Act,1955 kübok Citizenship (Registration of Citizens aser Issue of National Identity Cards) Rules, 2003 Rule 3, Sub-rule (4) dak ajemdaker centre sorkari 2020 küm April nungi tenzüka Assam dak alaker linük ajunga nung population register renema update asütsü telemtetba agi,” ta pai ashi.
Kasa mapang nung West Bengal chief minister Mamata Banerjee-i, northeast aser BJP-i yimsü masüba state tem nung CM tem dang telemtetba ka magi tsüngda NPR form nung tasüngdangba aser criteria jung junga asadangtsü mepeshiogo.
Iba inyakyim nung lendong keta lir ta shia Banerjee-i, form kong tasoba anogo aser tsürapurtem talidak osang tejangja meshir, iba ya National Register of Citizens (NRC) nungi jakzükba lir, ta ashi.
Kerala sorkaria, parnoki nütsüngyongsük züngdangba maparenbo inyaktsü saka NPR inyakyim nung shilem magitsü ta sangdongogo.
Ita ka tejakdang Congress tir Sonia Gandhi leniba nung opposition party 20 senden amenba mapang parnok NRC mebenoktsü asoshi telemtetba agi aser CM tem dang par state nung NRC mebenoktsü aser NPR inyakyim nung shilem magitsü asoshi asadangtsü atema mepeshitsü telemtetba agi, kechiyong iba ya NRC benoktsü asoshi mezüngbuba jenjang lir.