NPRAAF-i 33% women reservation pusema nungiter

Dimapur, November 6 (TYO) : T.R Zeliang sorkari tetsür nem shilem 33 lemzüktsütsü telemtetba agiba aser local body election agitsü lemtetba nung Nagaland Public Rights Awareness and Action Forum (NPRAAF)-i pusema nungiter.
Democracy ka nung, nisung ajakibo teinyaktsü sentong yangluba magizüktsü, anungji ajak den asüngdangyar lemtetba kaji amajok mekümdaktsütsüla. Iba reservation policy ya tetsürtem jenjang ajemzüka benshiba tangatetba ka masü saka Naga nunger tarutsü ajungtsü atema shisashirtem aser tetsürtem shilem agitsü ajungmesoba ka dang lir, ta Information & Publicity cell, NPRAAF sangdong ka nung ashi.
Naga nunger loktiliba nung asenok kodang tetsürtem ajemzüka mamshir aser parnok tebur den kasa jenjang nung züngoka amshir. Tetsürtem nem shilem melemzüktsüaka, parnoki yimten mapa nunga tongti shilem agiogo saka parnok policy body tem nung yakyaka shilem agiba mangur,
Anungji, sorkar indang reservation policy ya tetsürtem policy decision body tem nung shilem agidaktsütsü atema lir aser ibaji ajanga asen democracy tashi itshitsü aser ajangzüktsü. Anungji, NPRAAF-i civil society aser yimten teloktem dang iba telemtetba pusema nungittsü mepishir, ta NPRAAF-isa metetdaktsü.
NPRAAF-isa state sorkar dang Hornbill Festival mapang gari lenmang tera atepbangba dang masü saka state nung gari lenmang tia tajungba kümdaktsütsü atema junga yanglushitsü mepishir, ta sangdong nungsa shisem.