NPRAAF-i agütsüba ken o NIC-i angadangtsü

Dimapur, June 14 (TYO) : Nagaland nung tashiyim agi saru saruba mapatem indang bushisüngdangtsü asoshi yaküm küm High Powered Committee ka shim aser iba committee jagi sorkar nem parnoki bushitetba osang (report) agütsüogo, ajisüaka sorkari ibaji yimjak nung memetetdaktsüba ajanga, mulungtet telok ka tenüng agi Nagaland Public Rights Awareness and Action Forum (NPRAAF)-i Home department dang RTI ajanga iba report-ji meshi saka magütsü.
Anungji, kasa telokisa Nagaland Information Commission (NIC) nem metetdaktsü aser iba kasa ken o ji angadangtsü atema Chief Information Commissioner, Wb. Toshi Aier, IAS (retd)-i June 16, 2016 nü Nagaland Information Commission office nung jaoka lir.
Iba ken o angadangba mapang Home Department nungi PIO aser NPRAAF purtem adentsü jaoka lir.
Nagaland nung telok balalai tashiyim agi sen saruba tensa tia indang bushisüngdanga renemba osangji miimshia ayutsüla maparen ka masü, ibaji kecha ozüng agia alena mali ta parnokisa metetdaktsü.
Sorkari iba HPC osangji ano committee kati reprangshidagi ta ashir saka shitakba HPC purtemi agiba mapang dang nungi tereprangshitsü shimba committee-isa mapang talangba agir ta NPRAFF-i sorkar dak temulung melemtetba osang ka metetdaktsü.
Tashiyim agi nübortem dang sen saruba ya kanga süoki ia inyaktsüba mapa ka lir, anungji NIC nungi ochiobendang angutsü imlar ta  NPRAAF telokisa metetdaktsü.