NPRAF-i RD Dept nem anogo 7 latettsür

Kohima, December 21 (TYO): October 08, 2017 nü NPRAAF-i osangkaket balala ajanga Nagaland nung 2016-17 aser 2017-18 küm MGNREGA scheme atema sen crore 1000 dak tema lemzüktsüba jungkai adoka sangdongogo; aser item senotsü tim mesüi amshiogo ta tai tongloktsüba aika nung ajemdaker NPRAAF-i Rural Development Department dang district, block aser yimtsüngtem sasep nung material aser labour atema senotsü indokba aser sen teindokba ajakji osangkakettem ajanga nüburtem dang sangdongtsü mepishia metetdaktsü, ta tanü Information & Publicity Cell, Nagaland Public Rights Awareness & Action Forum-i sangdong ka ajanga metetdaktsü.
NPRAAF-isa Department dang, item osangji nübur dang yimjak nung mesangdongra NPRAAF-i tim authority dang RD Department ajak CBI nem bushisüngdangdaktsütsü atema mepishitsüsa akumtsü, ta metetdaktsü.
“Ajisüaka RD Department-i NPRAAF-i mepishibaji sendoka yutsür; Iba ya sen aika indang lir aser RD Department-i item senotsü ketdangsüa amshiba sangdongtsü memelunger, anungji NPRAAF-i MGNREGA senotsü onükji balaka kümdaktsür bushisüngdangtsü atema Centre dang mepishitsü bilemer. India sorkari Nagaland nem MGNREGA senotsü yokba anentsüra iba khuretji NPRAAF-i mabentsü,” ta kasa sangdong ajanga metetdaktsü.
“Anungji ano khen RD Department dang anogo tenet tsüngda nüburtem dang MGNREGA senotsü amshiba osang tejangja metetdakjang ta nenshia metetdaktsür,” ta NPRAAF-isa metetdaktsüogo.