NPYC-i gari lenmang majungba atema poster campaign tenzüker

Kohima, August 22 (TYO): Mongulbarnü Nagaland Pradesh Youth Congress (NPYC)-i state nung gari lenmang majungba anema poster campaign ka tenzükogo.

Tanü Youth Congress-i district headquarters 11 prongla nung posters aser placards maloka yutsü aser külen state yimtiba nung NPYC tir Vilhousilie Kenguruse-i anir ketdangpurtem den züngsemtemi yimyim ayima lungkak ait.

Engineer-in-Chief PWD indang office kima nung lungkak aitba sentong agidang, Kenguruse-i “Sensotem nem lenmang tajung agütsütsüla, saka tesüiba küm 15 tashi NPF-i aniba DAN sorkari Nagaland nung aliba gari lenmangtem nung ongkentem renlokdaktsüogo” ta ashi.

Tang NPF-BJP teloktep sorkar ya ‘potholes government’ lir. Prime Minister’s Gram Sadak Yojana, Non-Lapsable Pool of Central Resources, North Eastern Council amala scheme tem ajanga Centre-i sen crore aika yoker aser ano talisa annual road maintenance fund sen crore 40 agütsüogo, saka senji MLA tem indang pocket money aküm aser lenmangtembo tamajungba aküm, ta Vilhousilie-isa ashi.

“Asen state nung gari lenmangtem ayong aser tzübutem ama kümogo. Sorkari public atema aria bilemtsür süra, parnoki scheme balala ajanga gari lenmang yanglutsüla” ta paisa ashi.

Tang aliba state sorkari NPF election manifesto melenshiba ajanga Naga nunger ashioktsüogo. Parnoki ‘terenlok atema yimjung aser yimjung atema terenlok’ ta nangzük saka ongkentem ang renloktsüogo, ta Kenguruse-i shisem.

NPYC-i 2013 nungi 2017 tashi Centre-i sen agütsüba osang metettsü atema RTI ka agütsüogo. Onoki iba RTI telangzübaji yimjak nung metetdaktsütsü aser Department nungi telangzüba anguba sülen kechi teinyaktsü tim’ar inyaka aotsü, ta paisa ashi.