NPYC-i Home Minister aser MKR Pillai anentsütsü akhanger

Kohima, July 4 (TYO): Nagaland Pradesh Youth Congress (NPYC)-i Home Minister Y Patton mapa nungi agientsü aser MKR Pillai indang consultancy services anentsütsü atema takhangba agütsü.
Mongulbarnü Congress Bhavan nung osangbener den senden ka nung, NPYC President Vilhousilie Kenguruse-i ashiba agi, parnoki tanep Raj Bhavan nung State Angh, P B Acharya nem tezüluba ka nung takhangbatem agütsü.
Taoba Assembly session nung Home Minister-i Police Department kübok ‘backdoor’ inyakyim ajanga Constable, Sub-Inspector aser Assistant Sub-Inspector 2000 dak tema aniokogo ta ashiba aitsür aser iba ajanga Nagaland nung lanurtem akoksadaktsüogo, ta NPYC-i ashi.
“Home Minister-i nübortem asoshi inyaktsü aser tejak mereprangi inyakyim ajak nung temeten agütsütsü ta nangzükba ama mesüi inyakogo” ta parnokisa shisem.
State sorkari zünger mapa manguba lanurtem nem maongka agüja, department ajak nung ‘backdoor appointments’ anentsüla, ta parnokisa takhangba agütsü.
Kerala nung Police Modernisation in Nagaland, Consultant, MKR Pillai’er kidang sen aika ngutetba atema NPYC-isa ashiba agi, ‘Pillai-i Nagaland state project indang sen auyazük asütsü amai temulung melemi bilemer.’
“Pai sen paikaji bendentetba nungji tashishitsü keta lir aser tangsatang pa indang consultancy service ji anentsüla” ta NPYC-isa ashi.
State sorkari June 14, 2017 nü Pillai consultancy service anentsü ta metetdaktsü saka tanü tashi iba dak sendakba nung official sangdong ka danga mali aser pai consultant ama inyaker, ta parnokisa shisem.
Iba ken o anaprong asoshi Home Minister-i Department in-charge ka ama tebilemtsü bena mapa nungi anentsüla mesüra sorkari pa anentsütsüla. Nagaland nung lanurtemi tang aliba NPF-i aniba DAN sorkar dak temulung malemer. Anungji, public tsüngdang ochi jungkai adoka sayutsü atema CBI nem bushisüngdang südaktsütsüla, ta NPYC-isa takhangba agütsü.
Pillai-i State Police project senotsü tim mesüi amshir alitsü akok ta temulung melemi bilemba agi, NPYC-i Police Headquarter nung RTI benok.
Parnoki, 2005 nungi 2017 tashi Ministry of Home Affairs nungi Police modernization project atema senotsü aruba osang tejangja meshiogo. Iba denji külemii, NPYC-isa kasa mapang nung senotsü endokba aser utilization certificate tem osang meshiogo.