NRB-i state sorkar teyari meshir

Kohima, April 18 (TYO): Nagaland Rural Bank (NRB) nung state sorkar shilem crore 2.5 enokbaji mali ama kümogo aser ibaji ajanga tajangzük kwiar meshiteter.
Hombarnü Secretariat Conference hall nung AHODs aser HODs senden nung NRB Chairman, C R Aiyar-i iba osang metetdaktsü.
Paisa ashiba agi, Kohima, Wokha, Mokokchung, Zunheboto aser Dimapur district pungu nung NRB kongsang 11 lapoka lir.
State sorkari ketdangsüa reprangba Rural Bank tem rongnung mapa takok ngua meinyaktetba bank temji Nagaland, Manipur aser Arunachal Pradesh nung lir, ta Aiyar-isa ashi.
NRB tamakok anguba atema kuli aika lir aser item rongnung sorkar mapa inyakertemia dena loan meyipa magütsüba dena lir, ta paisa shisem.
Nagaland Rural Bank ketdangsüa aotsü kanga tasak kümogo aser mekümdangra iba bank shibangtsüsa akümtsü. Anungji bank shia arudaktsütsü atema Chief Secretary-i tiyongtsü nung mapa inyaktsü mepishir, ta Aiyar-isa tanü senden nung ashi.
“Sorkar mapa inyakertemi NRB ajanga senotsü mapa inyaktsüla. NRB ya local bank ka lir anungji state adena orr alirtemi iba bank nung sen rizünga mayutsü. Iba jagi onoki Agriculture, Social Welfare aser Industries department tem ama den külemi inyaknür” ta NRB Chairman-isa metetdaktsü.
Aiyar-isa, Nagaland kübok tanüngba district 6 nunga NRB kongsangtem lapoktsü mulunga lir ta ashi aser sorkar mapa inyakertemi Prime Minister-i tenzüktsüba social security scheme asem – Pradhan Mantri Jeevan Jyoti Bima Yojana, Pradhan Mantri Suraksha Bima Yojana aser Atal Pension Yojana tem NRB nung lapoktsü ajungmesotsüla, ta shisem.
NRB Chairman-i ashiba onüktem nung ajemdaker Chief Secretary, Pankaj Kumar-i government departments aser employees-i sorkar meyong bank tem nung senotsü dak sendakba mapa inyaktsü ayongzük.
Senden nungsa Corporate Social Responsibilities (CSR) activities kuli metetba sülen ang bank nung account lapoktsüla ta tebilemba lemsatep.