NRC benokba ajanga nüburtemi timtem ajurutsü: Owaisi

Hyderabad, Yimpoksüi/November 21 (Agencies): NDA sorkair linük tesem ajaklen NRC benoktsü atema sentong yangluba aija tanü AIMIM Tir, Asaduddin Owaisi-i, linük tesem ajaklen NRC mapatong benokba ajanga nüburtemi, talisa minority temi timtem ang tali ajurutsü, ta ashi.
Brihostibarnü All India Majlis-e-Ittehadul Muslimeen (AIMIM) Tir, Owaisi-i twitter ajanga, “Modi-i ano India nunger ajak tarensena nokdakdaktsüner, kulikaket maliba India nunger, minorities aser tashi maitertem timtemi yokner. Tanga lima kecha nhunga nüburtem nem iba ama timtem magütsür,” ta ashi.
Assam sorkari Centre dang state nung update asüba NRC magizüktsü atema mepishiba dak sendakba nung pai iba o ya jembi.
Yashi Assam finance minister, Himanta Biswa Sarma-i state sorkari Centre dang state nung final National Register of Citizens (NRC) magizüktsü mepishiogo, ta metetdakja liasü.
Yashi Rajya Sabha nung Union home minister Amit Shah-i, NRC mapatong ya linük tesem ajklen benoktsü ta sangdongba pelaa agizüka Sarma-i, Centre-i parnok ashi angaba atema state sorkar pelar aser Citizenship (Amendment) Bill agizükba sülen iba maatong tenzüktsü, ta ashi.